રાજકોટ શહેર અને જિલ્લામાં ગેરકાયદેસર નશીલા પદાર્થોની હેરાફેરી સામે પોલીસ દ્વારા સતત કાર્યવાહી કરવામાં આવી રહી છે. ત્યારે રાજકોટ SOG (સ્પેશિયલ ઓપરેશન ગ્રુપ)ને મળેલી બાતમીના આધારે રાજકોટ-અમદાવાદ હાઈવે પર બામણબોર ગામ તરફ જવાના રસ્તા નજીક દરોડો પાડવામાં આવ્યો હતો. આ કાર્યવાહીમાં પોલીસે ગાંજાનો મોટો જથ્થો ઝડપી પાડીને નશાના કારોબાર સાથે સંકળાયેલા ચાર આરોપીઓ સામે કાયદેસરની કાર્યવાહી હાથ ધરી છે.
પોલીસને બાતમી મળી હતી કે બામણબોર તરફના રસ્તા પરથી ગાંજાનો જથ્થો લઈ જવામાં આવી રહ્યો છે. બાતમીને આધારે SOGની ટીમે સ્થળ પર વોચ ગોઠવી તપાસ હાથ ધરી હતી. દરમિયાન શંકાસ્પદ ટ્રકને અટકાવી તેની તલાશી લેતા ટ્રકમાંથી ગાંજાનો મોટો જથ્થો મળી આવ્યો હતો.
પોલીસ તપાસ દરમિયાન ટ્રકમાંથી કુલ 204.900 કિલોગ્રામ ગાંજો મળી આવ્યો હતો. પોલીસે જપ્ત કરેલા ગાંજાની અંદાજિત કિંમત રૂ. 1,02,45,000 હોવાનું સામે આવ્યું છે. આટલા મોટા પ્રમાણમાં ગાંજાનો જથ્થો મળી આવતા પોલીસ તંત્રમાં પણ ચકચાર મચી હતી.
દરોડા દરમિયાન પોલીસે ટ્રકના ડ્રાઈવર અને ક્લીનર તરીકે કામ કરતા મહમદ ઉર્ફે કાળો હુશેનભાઇ (ફકીર) અને અરબાઝ સલીમભાઇ સંધીને ઝડપી પાડ્યા હતા. બંનેની પૂછપરછ દરમિયાન ગાંજાના જથ્થાની હેરાફેરી અંગે મહત્વની વિગતો સામે આવી હોવાનું પોલીસ તપાસમાં જાણવા મળ્યું છે.
પોલીસની પ્રાથમિક તપાસ મુજબ રમીઝ ઉર્ફે માયો રજાકભાઇ, રહે. જંગ્લેશ્વર, દ્વારા પકડાયેલા બંને ઇસમોને એક ટ્રીપના રૂ. 20,000 આપવાનું કબૂલ કરવામાં આવ્યું હોવાનું સામે આવ્યું છે. આથી ગાંજાની હેરાફેરીમાં તેની પણ સંડોવણી હોવાનું પોલીસ તપાસમાં ખુલ્યું છે.
આ ઉપરાંત તપાસમાં અમિત ઉર્ફે ગુરખો, રહે. હડાળા, મોરબી રોડનું નામ પણ સામે આવ્યું છે. પોલીસના જણાવ્યા મુજબ પકડાયેલો ગાંજાનો જથ્થો ઓડિશાથી સપ્લાય કરવામાં આવ્યો હતો અને આ જથ્થો અમિત ઉર્ફે ગુરખો દ્વારા પૂરો પાડવામાં આવ્યો હોવાનું તપાસમાં સામે આવ્યું છે.
આ સમગ્ર મામલે પોલીસે ચારેય આરોપીઓ વિરુદ્ધ ગુનો દાખલ કરી વધુ તપાસ હાથ ધરી છે. ગાંજાનો જથ્થો ઓડિશાથી રાજકોટ સુધી કેવી રીતે લાવવામાં આવ્યો, આ નેટવર્કમાં અન્ય કેટલા લોકો સંકળાયેલા છે અને ગાંજો ક્યાં પહોંચાડવાનો હતો તે સહિતના મુદ્દાઓ અંગે પોલીસ દ્વારા તપાસ કરવામાં આવી રહી છે.
SOGની કાર્યવાહીમાં માત્ર ગાંજાનો જથ્થો જ નહીં પરંતુ હેરાફેરી માટે ઉપયોગમાં લેવાતો ટ્રક, ટ્રકમાં ભરેલા સ્ટીલના પાઇપ અને મોબાઇલ ફોન સહિતનો મુદ્દામાલ પણ કબજે કરવામાં આવ્યો છે. પોલીસે કબજે કરેલા તમામ મુદ્દામાલની કુલ કિંમત રૂ. 1,55,73,730 જેટલી હોવાનું જણાવાયું છે.
આ કાર્યવાહી બાદ રાજકોટ પોલીસ દ્વારા ગેરકાયદેસર નશીલા પદાર્થોની હેરાફેરી કરનારા તત્વોમાં ફફડાટ ફેલાયો છે. ખાસ કરીને અન્ય રાજ્યમાંથી રાજકોટ અને આસપાસના વિસ્તારોમાં ગાંજાનો જથ્થો લાવી સપ્લાય કરવાના નેટવર્કને તોડી પાડવા માટે પોલીસ દ્વારા વધુ તપાસ હાથ ધરવામાં આવી રહી છે.
હાલ ચારેય આરોપીઓ સામે કાયદેસરની કાર્યવાહી કરવામાં આવી છે અને સમગ્ર કેસની તપાસ ચાલુ છે. પોલીસ તપાસ આગળ વધતા ગાંજાના સપ્લાય અને વિતરણ સાથે સંકળાયેલા અન્ય લોકોના નામ પણ બહાર આવે તેવી શક્યતા છે.
