સુરતમાં એક જ પરિવારના પાંચ સભ્યોને ફૂડ પોઈઝનિંગની અસર થતાં ચકચાર મચી છે. શનિવારે રાત્રે પરિવાર દ્વારા શીતલ રેસ્ટોરન્ટમાંથી જમવાનું મંગાવવામાં આવ્યું હતું. જમ્યા બાદ પરિવારના સભ્યોની તબિયત અચાનક લથડી હતી. ત્યારબાદ તમામને તાત્કાલિક સારવાર માટે ખાનગી હોસ્પિટલમાં ખસેડવામાં આવ્યા હતા.
મળતી માહિતી મુજબ, પરિવારના માતા-પિતા અને બે બાળકીઓ સહિત કુલ પાંચ સભ્યોને ફૂડ પોઈઝનિંગની અસર થઈ હતી. શરૂઆતમાં પરિવારના તમામ સભ્યોની તબિયત બગડતાં તેમને તાત્કાલિક હોસ્પિટલમાં લઈ જવામાં આવ્યા હતા. હોસ્પિટલમાં સારવાર દરમિયાન પરિવારની પાંચ વર્ષની બાળકી આર્યાની તબિયત વધુ ગંભીર બની હતી.
આર્યાની સ્થિતિ નાજુક બનતાં તબીબો દ્વારા તેને બચાવવા માટે સારવારના પ્રયાસો કરવામાં આવ્યા હતા. જોકે, સારવાર દરમિયાન પાંચ વર્ષની આર્યાનું મોત નીપજ્યું હતું. બાળકીના મોતને પગલે પરિવાર પર દુઃખનો પહાડ તૂટી પડ્યો છે.
બીજી તરફ, પરિવારના અન્ય સભ્યોની પણ તબિયત ગંભીર હોવાનું સામે આવ્યું છે. માતા-પિતા સહિત બીજી બાળકી હાલમાં હોસ્પિટલમાં સારવાર હેઠળ હોવાનું જાણવા મળ્યું છે. ફૂડ પોઈઝનિંગની અસર કયા ખોરાકને કારણે થઈ અને રેસ્ટોરન્ટમાંથી મંગાવવામાં આવેલા ભોજનમાં કોઈ ખામી હતી કે કેમ તે અંગે હવે તપાસનો વિષય બન્યો છે.
પરિવાર દ્વારા શનિવારે રાત્રે શીતલ રેસ્ટોરન્ટમાંથી ભોજન મંગાવવામાં આવ્યું હતું અને ભોજન લીધા બાદ થોડા સમય પછી તબિયત ખરાબ થવાની શરૂઆત થઈ હોવાનું સામે આવ્યું છે. એક જ પરિવારના પાંચ સભ્યોને એકસાથે ફૂડ પોઈઝનિંગની અસર થતાં સમગ્ર મામલે તંત્રની કામગીરી સામે પણ સવાલો ઊભા થયા છે.
ઘટનાની જાણ થતાં સંબંધિત તંત્ર દ્વારા સમગ્ર મામલાની તપાસ કરવામાં આવે તેવી માંગ ઉઠી છે. રેસ્ટોરન્ટમાંથી મંગાવવામાં આવેલા ખોરાકના સેમ્પલ લેવામાં આવે, તેની ગુણવત્તાની તપાસ કરવામાં આવે અને જો ખોરાકમાં કોઈ ભેળસેળ કે બેદરકારી સામે આવે તો જવાબદારો સામે કડક કાર્યવાહી કરવામાં આવે તેવી માંગ કરવામાં આવી રહી છે.
હાલ પરિવારના અન્ય સભ્યોની સારવાર ચાલી રહી છે. બાળકી આર્યાના મોતથી પરિવારજનોમાં શોકનો માહોલ છે. ફૂડ પોઈઝનિંગની આ ઘટનાનું ચોક્કસ કારણ તપાસ પૂર્ણ થયા બાદ જ સ્પષ્ટ થશે. તંત્ર દ્વારા સમગ્ર ઘટનાની નિષ્પક્ષ તપાસ કરવામાં આવે અને જવાબદાર વ્યક્તિ કે સંસ્થા સામે યોગ્ય કાર્યવાહી થાય તેવી માંગ ઉઠી રહી છે.
