રાજકોટમાં ગુજરાત રાજ્ય શાળા પાઠ્યપુસ્તક મંડળ અને GCERT દ્વારા તૈયાર કરવામાં આવતી પાઠ્યપુસ્તકોમાં ક્ષતિઓ હોવાના આક્ષેપોને લઈને વિવાદ સર્જાયો છે. ખાસ કરીને ધોરણ 6 અને ધોરણ 8ના સંસ્કૃતના પાઠ્યપુસ્તકોમાં અનેક ભૂલો હોવાનો કોંગ્રેસે દાવો કર્યો છે.
કોંગ્રેસના જણાવ્યા મુજબ પુસ્તકોમાં રહેલી ક્ષતિઓ અંગે જાગૃત નાગરિક ડૉ. ભરતકુમાર કોયાણી દ્વારા છેલ્લા એક વર્ષથી પુરાવા સાથે રજૂઆતો કરવામાં આવી રહી છે. તેમ છતાં સમસ્યાનો સંપૂર્ણ ઉકેલ આવ્યો ન હોવાનો આક્ષેપ કરવામાં આવ્યો છે.
ધોરણ 6માં 52થી વધુ અને ધોરણ 8માં 100થી વધુ ભૂલો હોવાનો દાવો
કોંગ્રેસે રજૂ કરેલા આક્ષેપ મુજબ ધોરણ 6ના સંસ્કૃતના પાઠ્યપુસ્તકમાં 52થી વધુ ક્ષતિઓ, જ્યારે ધોરણ 8ના સંસ્કૃતના પુસ્તકમાં 100થી વધુ ક્ષતિઓ હોવાનું જણાવાયું છે.
પાઠ્યપુસ્તકોમાં ભાષાકીય અને અન્ય પ્રકારની ભૂલો હોવાના આક્ષેપો વચ્ચે વિદ્યાર્થીઓને આપવામાં આવતા અભ્યાસક્રમની ગુણવત્તા અંગે પણ સવાલો ઉઠાવવામાં આવ્યા છે.
પાઠ્યપુસ્તક મંડળે ભૂલો સ્વીકારી હોવાનો કોંગ્રેસનો દાવો
કોંગ્રેસના જણાવ્યા પ્રમાણે ધોરણ 8ના સંસ્કૃત પાઠ્યપુસ્તકમાં કેટલીક ક્ષતિઓ હોવાનું પાઠ્યપુસ્તક મંડળે સ્વીકાર્યું હોવાનો દાવો કરવામાં આવ્યો છે. જોકે, આ સમગ્ર મામલે સંબંધિત સત્તાવાળાઓ તરફથી ભૂલો સુધારવા અને વિદ્યાર્થીઓ સુધી યોગ્ય પુસ્તકો પહોંચાડવા માટે તાત્કાલિક પગલાં લેવાની માંગ ઉઠી છે.
20 દિવસમાં પુસ્તકો પરત ખેંચવાની માંગ
કોંગ્રેસે સરકાર અને સંબંધિત વિભાગ સમક્ષ ભૂલવાળા પાઠ્યપુસ્તકો 20 દિવસની અંદર પરત ખેંચી લેવાની માંગ કરી છે. સાથે જ વિદ્યાર્થીઓને સુધારેલા અને સાચા પાઠ્યપુસ્તકો ઉપલબ્ધ કરાવવામાં આવે તેવી માગણી કરવામાં આવી છે.
કોંગ્રેસે ચેતવણી આપી છે કે જો નિર્ધારિત સમયગાળામાં ભૂલવાળા પુસ્તકો પરત ખેંચીને વિદ્યાર્થીઓને યોગ્ય પુસ્તકો આપવામાં નહીં આવે, તો આ મુદ્દે રાજ્યવ્યાપી આંદોલન કરવામાં આવશે.
હાલમાં સમગ્ર મામલે સરકાર અને પાઠ્યપુસ્તક મંડળ શું પગલાં લે છે તેના પર શિક્ષણ જગતની નજર છે.
