અમરેલી જિલ્લાના લાઠી તાલુકાના દુધાળા ગામ નજીક ગાગડિયો નદી પર ધોળકિયા ફાઉન્ડેશન દ્વારા તૈયાર કરાયેલા ‘ગુજરાત ગૌરવ સરોવર’નું કેન્દ્રીય ગૃહ અને સહકાર મંત્રી અમિત શાહના હસ્તે લોકાર્પણ કરવામાં આવ્યું. આશરે ₹4 કરોડના ખર્ચે બનેલા આ સરોવરમાં હાલમાં લગભગ 23 કરોડ લિટર પાણીનો સંગ્રહ થયો છે.
80 હજાર ચોરસ ફૂટ વિસ્તારમાં તૈયાર થયું સરોવર
દુધાળા નજીક ગાગડિયો નદી પર જળસંચયને મજબૂત બનાવવા માટે ‘ગુજરાત ગૌરવ સરોવર’નું નિર્માણ કરવામાં આવ્યું છે. આશરે 80,000 ચોરસ ફૂટ વિસ્તારમાં ₹4 કરોડના ખર્ચે તૈયાર થયેલા આ સરોવરમાં ચાલુ ચોમાસામાં સારા વરસાદના કારણે મોટી માત્રામાં પાણીની આવક થઈ છે.
લોકાર્પણ પ્રસંગે અમિત શાહે તક્તીનું અનાવરણ કર્યું હતું. કાર્યક્રમમાં નાયબ મુખ્યમંત્રી હર્ષ સંઘવી, અમરેલી જિલ્લા પ્રભારી અને કૃષિ મંત્રી જીતુ વાઘાણી, ઊર્જા રાજ્યમંત્રી કૌશિક વેકરિયા સહિતના મહાનુભાવો ઉપસ્થિત રહ્યા હતા.
‘જળસંચયથી દુષ્કાળની સમસ્યા દૂર કરી શકાય’
અમિત શાહે જળસંચયના મહત્વ પર ભાર મૂકતા જણાવ્યું કે વરસાદી પાણીનું યોગ્ય રીતે સંરક્ષણ અને જમીનમાં ઉતારવાની વ્યવસ્થા કરવામાં આવે તો પાણીની અછત સામે લાંબા ગાળે અસરકારક રીતે લડી શકાય છે.
તેમણે ગુજરાતમાં ચેકડેમ, સરોવર અને નર્મદા આધારિત વિવિધ જળસંચય યોજનાઓનો ઉલ્લેખ કરીને પાણીના સંરક્ષણને ભવિષ્ય માટે અત્યંત મહત્વપૂર્ણ ગણાવ્યું.
તેમના જણાવ્યા મુજબ, જળસંચય ક્ષેત્રે લોકભાગીદારી અને આયોજનબદ્ધ કામગીરીથી ગુજરાતમાં પાણીની સ્થિતિમાં નોંધપાત્ર પરિવર્તન આવ્યું છે.
100થી વધુ ગામોને મળશે સીધો લાભ
હર્ષ સંઘવીએ ધોળકિયા ફાઉન્ડેશનની કામગીરીને બિરદાવતા જણાવ્યું કે સૌરાષ્ટ્રની અગાઉ સુકાઈ ગયેલી નદીઓને પુનર્જીવિત કરવાનું કામ આગામી પેઢી માટે મહત્વપૂર્ણ વારસો બની શકે છે.
ગાગડિયો નદી અને આસપાસના વિસ્તારોમાં રાજ્ય સરકાર તથા ધોળકિયા ફાઉન્ડેશનની ભાગીદારીથી નદી ઊંડી કરવાની કામગીરી હાથ ધરાઈ છે. માહિતી મુજબ, વિવિધ સ્થળોએ આશરે 40 સરોવરોના નિર્માણથી 100થી વધુ ગામોને લાભ મળવાની શક્યતા છે. આ જળસંચયના કામોથી ભૂગર્ભજળનું સ્તર સુધરવાની સાથે ખેતી, સિંચાઈ અને પીવાના પાણીની ઉપલબ્ધતામાં પણ મદદ મળવાની આશા છે.
જળસંચયની કામગીરીને મળ્યો નવો વેગ
ધોળકિયા ફાઉન્ડેશન દ્વારા અમરેલી જિલ્લામાં જળસંચય અને નદી પુનર્જીવનના વિવિધ પ્રોજેક્ટ હાથ ધરવામાં આવ્યા છે. અગાઉ ‘ભારત માતા સરોવર’ સહિતના પ્રોજેક્ટથી લાઠી અને લીલીયા તાલુકામાં ભૂગર્ભજળના સ્તરમાં સુધારો નોંધાયો હોવાનું જણાવાયું છે. ‘ગુજરાત ગૌરવ સરોવર’ પણ આ જ અભિયાનનો એક મહત્વપૂર્ણ ભાગ છે. ચોમાસાના પાણીનો સંગ્રહ કરીને તેને ભવિષ્યમાં ખેતી તથા સ્થાનિક પાણીની જરૂરિયાતો માટે ઉપયોગી બનાવવાનો મુખ્ય હેતુ છે.
News Hotspot સાથે જોડાવવા અહી ક્લિક કરો`
Facebook સાથે જોડાવા અહી ક્લિક કરો
Instagram સાથે જોડાવા અહી ક્લિક કરો
Twitter સાથે જોડાવા અહી ક્લિક કરો
Whatsapp ચેનલમાં જોડાવા અહી ક્લિક કરો
Website સાથે જોડાવા અહી ક્લિક કરો
