ભાવનગરમાં બનેલી લઠ્ઠાકાંડની ગંભીર ઘટના બાદ તેનો રાજકીય પડઘો હવે અમરેલીમાં પણ જોવા મળી રહ્યો છે. મૃતકોના પરિવારજનોને ન્યાય મળે અને સમગ્ર ઘટનાની જવાબદારી નક્કી થાય તેવી માંગ સાથે આમ આદમી પાર્ટી દ્વારા અમરેલીના રાજકમલ ચોક ખાતે વિરોધ પ્રદર્શન યોજવામાં આવ્યું હતું.
AAPના જણાવ્યા અનુસાર, પ્રદર્શન દરમિયાન કાર્યકર્તાઓ અને પદાધિકારીઓએ સરકાર સામે સૂત્રોચ્ચાર કરીને ઘટનામાં જવાબદાર લોકો સામે કડક કાર્યવાહી કરવાની માગ કરી હતી. સાથે જ ગુજરાતના ગૃહમંત્રીના રાજીનામાની પણ માંગ ઉઠાવવામાં આવી હતી.
AAPના નેતા અને કાર્યકર્તાઓ જોડાયા
આ વિરોધ પ્રદર્શન આમ આદમી પાર્ટીના પ્રદેશ સંગઠન મંત્રી અને અમરેલી જિલ્લા પ્રમુખ નિકુંજ સાવલિયાના અધ્યક્ષસ્થાને યોજાયું હતું. જેમાં જિલ્લા પંચાયત સદસ્ય વનરાજ વાળા સહિત પાર્ટીના કાર્યકર્તાઓ, પદાધિકારીઓ, સંગઠનના હોદ્દેદારો અને જનપ્રતિનિધિઓ જોડાયા હતા. AAPએ આ પ્રદર્શનને ભાવનગર લઠ્ઠાકાંડના મૃતકોને ન્યાય અપાવવા માટેના પોતાના આંદોલનનો ભાગ ગણાવ્યો છે.
કાર્યકરોને પોલીસ દ્વારા અટકાવ્યાનો AAPનો દાવો
AAPએ આરોપ લગાવ્યો છે કે વિરોધ દરમિયાન પોલીસ દ્વારા કેટલાક કાર્યકર્તાઓને અટકાવવામાં આવ્યા હતા અને અનેક લોકોને પોલીસ સ્ટેશન લઈ જવામાં આવ્યા હતા.
પાર્ટીએ આ કાર્યવાહી સામે પણ વાંધો વ્યક્ત કર્યો છે. AAPના જણાવ્યા મુજબ, લોકશાહી પદ્ધતિથી વિરોધ કરી રહેલા કાર્યકર્તાઓને અટકાવવું એ તેમના રાજકીય અવાજને દબાવવાનો પ્રયાસ છે.
‘જવાબદારી નક્કી થાય અને જવાબદારો સામે કાર્યવાહી થાય’
AAP અમરેલી જિલ્લા પ્રમુખ નિકુંજ સાવલિયાએ જણાવ્યું કે ભાવનગરની ઘટનામાં નિર્દોષ લોકોએ જીવ ગુમાવ્યા છે અને સમગ્ર પ્રકરણમાં જવાબદારી નક્કી થવી જરૂરી છે. તેમણે કહ્યું કે મૃતકોના પરિવારોને ન્યાય મળે અને જવાબદાર લોકો સામે કડક કાર્યવાહી થાય ત્યાં સુધી પાર્ટી આ મુદ્દે લોકોનો અવાજ ઉઠાવતી રહેશે.
AAPની 5 મુખ્ય માંગ
આમ આદમી પાર્ટીએ સરકાર સમક્ષ પાંચ મુખ્ય માંગો રજૂ કરી છે:
- ભાવનગર લઠ્ઠાકાંડની નિષ્પક્ષ અને ઉચ્ચસ્તરીય તપાસ કરવામાં આવે.
- ઘટનામાં સંડોવાયેલા તમામ જવાબદારો સામે કડક કાયદેસરની કાર્યવાહી થાય.
- મૃતકોના પરિવારજનોને યોગ્ય વળતર અને ન્યાય આપવામાં આવે.
- રાજ્યમાં ગેરકાયદેસર દારૂના નેટવર્ક સામે અસરકારક કાર્યવાહી કરવામાં આવે.
- ઘટનાની નૈતિક જવાબદારી સ્વીકારી ગુજરાતના ગૃહમંત્રી રાજીનામું આપે.
News Hotspot સાથે જોડાવવા અહી ક્લિક કરો`
Facebook સાથે જોડાવા અહી ક્લિક કરો
Instagram સાથે જોડાવા અહી ક્લિક કરો
Twitter સાથે જોડાવા અહી ક્લિક કરો
Whatsapp ચેનલમાં જોડાવા અહી ક્લિક કરો
Website સાથે જોડાવા અહી ક્લિક કરો
