શ્યામ સેદાણી, અમરેલી : માર્ગ અકસ્માતો ઘટાડવા અને વાહનચાલકોમાં સલામત ડ્રાઈવિંગ અંગે જાગૃતિ વધારવાના હેતુથી અમરેલી જિલ્લાના બાબરા ખાતે ડ્રાઈવરો માટે વિશેષ હેલ્થ ચેકઅપ કેમ્પ યોજાયો હતો. નેશનલ રોડ સેફ્ટી માસ-વીક અંતર્ગત યોજાયેલા આ કેમ્પમાં 152 જેટલા ડ્રાઈવરોની આરોગ્ય તપાસ કરવામાં આવી હતી.
આ કેમ્પનું આયોજન એ.આર.ટી.ઓ. અમરેલી, જિલ્લા ટ્રાફિક પોલીસ, સિવિલ સર્જનશ્રીની ટીમ અને મનહર ઓટોમોબાઈલ્સના સંયુક્ત સહયોગથી કરવામાં આવ્યું હતું.
BP, ડાયાબિટીસ અને આંખોની તપાસ
કેમ્પ દરમિયાન વાહનચાલકોની બ્લડ પ્રેશર, ડાયાબિટીસ અને આંખોની તપાસ કરવામાં આવી હતી. લાંબા સમય સુધી વાહન ચલાવતા ડ્રાઈવરો માટે શારીરિક અને દૃષ્ટિ સંબંધિત તંદુરસ્તી મહત્વપૂર્ણ હોવાથી તેમને સમયાંતરે આરોગ્ય તપાસ કરાવવા માટે પણ અપીલ કરવામાં આવી હતી.
તંત્રના જણાવ્યા મુજબ, શરૂઆતના તબક્કે કોઈ આરોગ્ય સમસ્યા સામે આવે તો સમયસર સારવાર મેળવી શકાય છે. ડ્રાઈવરોની તંદુરસ્તી સારી રહે તો માર્ગ અકસ્માતનું જોખમ ઘટાડવામાં પણ મદદ મળી શકે છે.
ટ્રાફિક નિયમો અંગે પણ કરાઈ જાગૃતિ
હેલ્થ ચેકઅપની સાથે કેમ્પમાં માર્ગ સલામતીને લગતા વિવિધ સંદેશાઓ દ્વારા વાહનચાલકોને જાગૃત કરવામાં આવ્યા હતા. કેમ્પ સ્થળે સીટબેલ્ટ, હેલ્મેટ, ઓવરસ્પીડ અને વાહન ચલાવતી વખતે મોબાઈલના ઉપયોગ અંગે જાગૃતિ ફેલાવતા બેનરો લગાવવામાં આવ્યા હતા.
‘ઓવરસ્પીડનો શોખ, પરિવારનો શોક’ અને ‘સીટબેલ્ટ બાંધો, જીવન સાથે જોડાયેલા રહો’ જેવા સંદેશાઓ દ્વારા ડ્રાઈવરોને ટ્રાફિક નિયમોનું પાલન કરવા સમજાવવામાં આવ્યા હતા.
PM-RAHAT અને રાહવીર યોજના અંગે માહિતી
કેમ્પમાં માર્ગ અકસ્માત બાદ મળતી મદદ અંગે પણ વાહનચાલકોને માહિતી આપવામાં આવી હતી. PM-RAHAT યોજના અંગે સમજાવતા જણાવાયું હતું કે માર્ગ અકસ્માતમાં ઈજાગ્રસ્ત વ્યક્તિને સમયસર હોસ્પિટલ પહોંચાડવામાં આવે તો પાત્રતા મુજબ રૂ.1.5 લાખ સુધીની કેશલેસ સારવાર અંગેની સુવિધા ઉપલબ્ધ છે.
આ ઉપરાંત રાહવીર યોજના વિશે પણ માહિતી આપવામાં આવી હતી. અકસ્માતમાં ઈજાગ્રસ્ત વ્યક્તિને સમયસર હોસ્પિટલ પહોંચાડવામાં મદદ કરનાર વ્યક્તિને પ્રોત્સાહનરૂપે રૂ.25,000 સુધીનું પુરસ્કાર મળી શકે છે, તેવી માહિતી આપવામાં આવી હતી.
સલામત ડ્રાઈવિંગ માટે સતત જાગૃતિ જરૂરી
આ સમગ્ર કાર્યક્રમનો મુખ્ય ઉદ્દેશ વાહનચાલકોને પોતાના આરોગ્ય પ્રત્યે જાગૃત કરવા સાથે ટ્રાફિક નિયમોના પાલન માટે પ્રોત્સાહિત કરવાનો હતો. તંત્ર દ્વારા સલામત ડ્રાઈવિંગ, ઓવરસ્પીડથી બચવા, સીટબેલ્ટ અને હેલ્મેટનો ફરજિયાત ઉપયોગ તેમજ ડ્રાઈવિંગ દરમિયાન મોબાઈલ ફોનથી દૂર રહેવા અંગે પણ અપીલ કરવામાં આવી હતી.
અમરેલી જિલ્લામાં માર્ગ સલામતીને લઈને આવા જાગૃતિ કાર્યક્રમો દ્વારા વાહનચાલકોમાં જવાબદારીપૂર્ણ ડ્રાઈવિંગની ભાવના વધારવાનો પ્રયાસ કરવામાં આવી રહ્યો છે.
News Hotspot સાથે જોડાવવા અહી ક્લિક કરો`
Facebook સાથે જોડાવા અહી ક્લિક કરો
Instagram સાથે જોડાવા અહી ક્લિક કરો
Twitter સાથે જોડાવા અહી ક્લિક કરો
Whatsapp ચેનલમાં જોડાવા અહી ક્લિક કરો
Website સાથે જોડાવા અહી ક્લિક કરો
