નેપાળમાં મોટી દુર્ઘટના, નુવાકોટમાં હેલિકોપ્ટર ક્રેશ થતાં 4 લોકોના મોત
નેપાળના નુવાકોટ જિલ્લાના શિવપુરીમાં એક હેલિકોપ્ટર ક્રેશ થયું છે. આ હેલિકોપ્ટર એર ડાયનેસ્ટીનું છે. પોલીસનું કહેવું છે કે હેલિકોપ્ટર સૂર્યચૌર પહાડી સાથે અથડાયું હતું, જેના કારણે આ દુર્ઘટના બની હતી. જેમાં ચાર લોકોના મોત થયા છે. અકસ્માત અંગે પોલીસ અધિકારી શાંતિ રાજ કોઈરાલાએ જણાવ્યું કે હેલિકોપ્ટર શિવપુરી-7 પાસે ક્રેશ થયું છે. પ્રાથમિક અહેવાલમાં જાણવા મળ્યું છે કે હેલિકોપ્ટર સૂર્યચૌર પહાડી સાથે અથડાયા બાદ અકસ્માત થયો હતો. પોલીસની ટીમો ઘટનાસ્થળે પહોંચી ગઈ છે. મોટી સંખ્યામાં સ્થાનિક લોકો પણ પહોંચ્યા છે.
તેમણે જણાવ્યું કે એર ડાયનેસ્ટીનું આ હેલિકોપ્ટર રાસુવાના સ્યાફ્રુબેસી માટે ઉડ્યું હતું. અકસ્માત બાદ હેલિકોપ્ટર ક્રેશ સ્થળ પર આગ ફાટી નીકળી હતી. રેસ્ક્યુ ઓપરેશન ચાલુ છે. કહેવામાં આવી રહ્યું છે કે હેલિકોપ્ટર ઉડાન ભર્યાના 3 મિનિટ પછી જ સંપર્ક તૂટી ગયો હતો. હેલિકોપ્ટરમાં કુલ 5 લોકો સવાર હતા.
હેલિકોપ્ટર કેપ્ટન અરુણ મલ્લ ઉડાવી રહ્યા હતા
આ દુર્ઘટનાને લઈને ત્રિભુવન ઈન્ટરનેશનલ એરપોર્ટે પણ નિવેદન જાહેર કર્યું છે. કહેવાય છે કે હેલિકોપ્ટર કેપ્ટન અરુણ મલ્લ ઉડાવી રહ્યા હતા. તાજેતરમાં ત્રિભુવન એરપોર્ટના પૂર્વ ભાગમાં સૌરી એરલાઈન્સનું એક વિમાન ક્રેશ થયું હતું. આ અકસ્માતમાં 18 લોકોના મોત થયા હતા. ઉડાન ભર્યા બાદ આ અકસ્માત થયો હતો. આ દુર્ઘટનાનું કારણ પ્લેન રનવે પર લપસી જવું હોવાનું કહેવાય છે. જેના કારણે પ્લેન જમીન પર પટકાયું અને આગ લાગી. આ પહેલા વર્ષ 1992માં પણ આ જ એરપોર્ટ પર એક મોટો અકસ્માત થયો હતો, જેમાં લગભગ 167 મુસાફરોના મોત થયા હતા.
નેપાળ વિશ્વમાં સૌથી વધુ વિમાન અકસ્માતો માટે જાણીતું છે. યુરોપિયન યુનિયને નેપાળની કોઈપણ એરલાઇનને તેની હવાઈ ક્ષેત્રમાં પ્રવેશવા પર પ્રતિબંધ મૂક્યો છે. જે પ્લેન ત્રિભુવન એરપોર્ટથી ટેક ઓફ કરવા રનવે પર દોડ્યું હતું તે લગભગ 150 કિમી દૂર પોખરા જઈ રહ્યું હતું.
