હરિયાણા વિધાનસભાની 90 વિધાનસભા બેઠકો માટે 5 ઓક્ટોબરે મતદાન થયું હતું અને મંગળવારે સવારે 8 વાગ્યાથી મત ગણતરી શરૂ થઈ ગઈ છે. હરિયાણામાં 90 બેઠકો માટે 464 અપક્ષ અને 101 મહિલાઓ સહિત કુલ 1,031 ઉમેદવારો મેદાનમાં છે. હરિયાણામાં આજે યોજાયેલી ચૂંટણીમાં મુખ્યમંત્રી નયબ સિંહ સૈની, ભૂપેન્દ્ર સિંહ હુડ્ડા અને કોંગ્રેસના વિનેશ ફોગટના ભાવિનો નિર્ણય થશે.આ વખતે ભાજપ રાજ્યમાં જીતની હેટ્રિકની આશા રાખી રહ્યું છે જ્યારે કોંગ્રેસ એક દાયકા પછી સત્તામાં પરત ફરવાની આશા રાખી રહી છે. હાલ હરિયાણામાં કોંગ્રેસ 34 બેઠકો પર આગળ છે ત્યારે બીજી તરફ ભાજપ 50 બેઠકો પર આગળ છે.
હરિયાણાના નૂહમાં હિંસાનો આરોપી કોંગ્રેસ નેતા મમન ખાન 97763 મતોથી આગળ છે. મમન ખાને નુહની ફિરોઝપુર ઝિરકા બેઠક પરથી ભાજપના નસીમ અહેમદને પાછળ છોડી દીધા છે. તે અત્યાર સુધીના સૌથી વધુ માર્જિનથી ટ્રેન્ડમાં આગળ છે. તેમના પછી રાજ્યના પૂર્વ મુખ્યમંત્રી ભૂપેન્દ્ર સિંહ હુડ્ડા સૌથી વધુ માર્જિન સાથે આગળ છે. ગઢી સાંપલા કિલોઈ સીટ પર 10મા રાઉન્ડની મતગણતરી બાદ તેઓ 56318 વોટથી આગળ છે.
કોંગ્રેસે સવાલ ઉઠાવ્યા
પ્રારંભિક લીડ પછી હરિયાણા ચૂંટણીના વલણોમાં કોંગ્રેસ પાછળ રહી જવા પર, કોંગ્રેસ નેતાએ કહ્યું કે ચૂંટણી પંચનો ડેટા અપડેટ કરવામાં આવી રહ્યો નથી. વહીવટીતંત્ર પર દબાણ લાવવા માટે ડેટા મોડો જાહેર કરવામાં આવી રહ્યો છે. પરંતુ કોઈએ નિરાશ થવાની જરૂર નથી.
વૉટશેરમાં કોંગ્રેસ આગળ
મંગળવારે સવારે 8 વાગ્યાથી હરિયાણા વિધાનસભાની મતગણતરી ચાલુ છે. ચૂંટણી પંચના આંકડા મુજબ સવારે 11.20 વાગ્યે કોંગ્રેસને 40.30 ટકા એટલે કે 18 લાખ 5 હજાર 654 વોટ મળ્યા છે. જ્યારે ભાજપને 39.07 ટકા એટલે કે 17 લાખ 50 હજાર 722 વોટ મળ્યા છે. આ રીતે કોંગ્રેસને કુલ મતો વધુ મળ્યા છે, પરંતુ ભાજપને વધુ બેઠકો મળી છે.
હરિયાણામાં ભાજપનો ઇતિહાસ
1980માં તેની સ્થાપનાના બે વર્ષ બાદ જ ભાજપે હરિયાણાની ચૂંટણી લડી હતી. 1982ની ચૂંટણીમાં ભાજપે છ બેઠકો જીતી હતી. ભાજપે 1987માં 16, 1996માં 11, 2000માં 6 અને 2005માં બે બેઠકો જીતી હતી. 2009માં પણ પાર્ટી બે આંકડા સુધી પહોંચી શકી ન હતી અને માત્ર ચાર સીટો જીતી શકી હતી. હરિયાણાની ચૂંટણીમાં ભાજપનું સર્વશ્રેષ્ઠ પ્રદર્શન 2014ની ચૂંટણીમાં આવ્યું જ્યારે ભાજપે 33.3 ટકા વોટ શેર સાથે 47 બેઠકો જીતી. 2019માં ભાજપનો વોટ શેર વધ્યો પરંતુ સીટો ઘટી અને પાર્ટી 36.7 ટકા વોટ શેર સાથે માત્ર 40 સીટો જીતી શકી. અત્યાર સુધીના વલણો મુજબ, ભાજપ 50 બેઠકો પર આગળ છે અને જો આ વલણો પરિણામોમાં પરિવર્તિત થાય છે, તો તે રાજ્યના ચૂંટણી ઇતિહાસમાં પક્ષનું અત્યાર સુધીનું શ્રેષ્ઠ પ્રદર્શન હશે.
