નેપાળમાં આવેલા વિનાશક પૂર અને ભારે વરસાદ બાદ અનેક વિસ્તારોમાં સ્થિતિ હજુ પણ અત્યંત મુશ્કેલ હોવાનું સામે આવી રહ્યું છે. પૂર બાદ શરૂ કરાયેલી શોધ અને બચાવ કામગીરી દરમિયાન અનેક લોકોના મોતની પુષ્ટિ થઈ છે, જ્યારે મોટી સંખ્યામાં લોકો હજુ પણ લાપતા હોવાના અહેવાલ છે.
મળતી માહિતી અનુસાર, અત્યાર સુધીમાં 962 મૃતદેહો મળી આવ્યા હોવાનો દાવો કરવામાં આવ્યો છે. બીજી તરફ, આશરે 4,000 લોકો હજુ ગુમ હોવાની માહિતી સામે આવી છે. કાટમાળ અને અસરગ્રસ્ત વિસ્તારોમાં બચાવ ટીમો દ્વારા શોધખોળ ચાલુ છે.
એક જ ઘરમાંથી મળ્યા 23 મૃતદેહ
મંગળવારે નુવાકોટ જિલ્લાના વેત્રાવંતી વિસ્તારમાં બચાવ કામગીરી દરમિયાન ચોંકાવનારી ઘટના સામે આવી. અહીં એક જ ઘરમાંથી 23 મૃતદેહો મળી આવ્યા હોવાનો અહેવાલ છે.
આ ઘટનાએ પૂરની વિનાશક અસરની ગંભીરતા વધુ સ્પષ્ટ કરી છે. અસરગ્રસ્ત વિસ્તારોમાં હજુ પણ અનેક સ્થળોએ કાટમાળ હટાવવાની અને લાપતા લોકોની શોધ કરવાની કામગીરી ચાલી રહી છે.
ગંડક નદીમાંથી પણ મૃતદેહ મળ્યા
નેપાળમાં આવેલા પૂરનો પ્રભાવ ભારતની સરહદ નજીક વહેતી નદીઓમાં પણ જોવા મળી રહ્યો છે. અહેવાલ મુજબ ભારતીય સરહદ વિસ્તારમાં ગંડક નદીમાંથી 23 મૃતદેહ મળી આવ્યા છે.
ભારતીય તંત્ર દ્વારા આ મૃતદેહોને ઓળખ અને આગળની કાર્યવાહી માટે નેપાળી એજન્સીઓને સોંપવાની પ્રક્રિયા હાથ ધરવાની તૈયારી કરવામાં આવી રહી છે.
હજારો લોકો હજુ લાપતા
પૂરની આફત બાદ સૌથી મોટો પડકાર લાપતા લોકોની શોધનો છે. અહેવાલો અનુસાર આશરે 4 હજાર લોકો હજુ સુધી ગુમ છે.
રાસુવા જિલ્લાના ઉત્તરગયા વિસ્તારમાં મોટી સંખ્યામાં વિદ્યાર્થીઓ ગુમ હોવાની માહિતી પણ સામે આવી છે. આ ઉપરાંત ત્રિશુલી વિસ્તારમાં આવેલા હાઇડ્રોપાવર પ્રોજેક્ટ સાથે જોડાયેલા અનેક લોકો અંગે પણ હજુ સુધી સ્પષ્ટ માહિતી મળી નથી.
હાઇડ્રોપાવર પ્રોજેક્ટમાં પણ લોકો ફસાયા
અહેવાલ મુજબ ત્રિશુલી-3A હાઇડ્રોપાવર પ્રોજેક્ટ સાથે જોડાયેલા આશરે 40થી 42 એન્જિનિયરો સહિતના લોકો અંગે ચિંતા વ્યક્ત કરવામાં આવી છે.
બીજી તરફ, ત્રિશુલી-3B હાઇડ્રોપાવર પ્રોજેક્ટમાં 118 લોકો ફસાયેલા હોવાનો અહેવાલ છે. તેમાં એન્જિનિયરો, અધિકારીઓ અને કામદારોનો સમાવેશ થાય છે. તેમની સાથે સંપર્ક સ્થાપિત કરવામાં મુશ્કેલી પડી રહી હોવાનું જણાવવામાં આવ્યું છે.
હવે સ્વચ્છતા અને રોગચાળાનો પડકાર
પૂરની આફત બાદ હવે અસરગ્રસ્ત વિસ્તારોમાં સ્વચ્છતા અને જાહેર આરોગ્ય પણ મોટો પડકાર બની રહ્યો છે. પૂર અને કાટમાળ વચ્ચે લાંબા સમયથી ફસાયેલા મૃતદેહોના કારણે કેટલાક વિસ્તારોમાં દુર્ગંધ ફેલાવાની ફરિયાદો સામે આવી રહી છે.
આ પરિસ્થિતિમાં બચાવ કામગીરી સાથે કાટમાળ દૂર કરવો, સ્વચ્છતા જાળવવી અને સંભવિત રોગચાળાને અટકાવવો તંત્ર માટે મહત્વપૂર્ણ પડકાર બની ગયો છે. નેપાળમાં રાહત અને બચાવ કામગીરી હજુ પણ ચાલુ છે. લાપતા લોકોની શોધ, અસરગ્રસ્તોને મદદ અને જાહેર આરોગ્યની સુરક્ષા માટે વિવિધ એજન્સીઓ કામગીરી કરી રહી છે.
News Hotspot સાથે જોડાવવા અહી ક્લિક કરો`
Facebook સાથે જોડાવા અહી ક્લિક કરો
Instagram સાથે જોડાવા અહી ક્લિક કરો
Twitter સાથે જોડાવા અહી ક્લિક કરો
Whatsapp ચેનલમાં જોડાવા અહી ક્લિક કરો
Website સાથે જોડાવા અહી ક્લિક કરો
