અમેરિકી રાષ્ટ્રપતિ જો બિડેનની મંજૂરી બાદ યુક્રેને પહેલીવાર રશિયા પર અમેરિકન મિસાઈલ છોડી છે. આરબીસી યુક્રેન અનુસાર, યુક્રેનિયન સૈન્યએ રશિયાની અંદર હુમલો કરવા માટે લાંબા અંતરની અમેરિકન ATACMS મિસાઇલોનો ઉપયોગ કર્યો છે. બિડેને રશિયાની અંદર હુમલા માટે અમેરિકન શસ્ત્રોનો ઉપયોગ કરવાની મંજૂરી આપ્યાના બે દિવસ બાદ આ હુમલો થયો છે.
આરબીસી યુક્રેન ન્યૂઝ એજન્સીએ એક સ્ત્રોતને ટાંકીને સૂત્રએ જણાવ્યું હતું. જણાવ્યું હતું કે આ હુમલો રશિયાના બ્રાયન્સ્ક ક્ષેત્રમાં કારાચેવમાં થયો હતો. “પ્રથમ વખત અમે એટીએસીએમએસનો ઉપયોગ રશિયન પ્રદેશ પર હુમલો કરવા માટે કર્યો હતો. આ હુમલો બ્રાયન્સ્ક ક્ષેત્રમાં લશ્કરી થાણા પર કરવામાં આવ્યો હતો અને તેને સફળતાપૂર્વક નિશાન બનાવવામાં આવ્યો હતો,”
આ કારણે અમેરિકાએ આપી મંજૂરી
ઉલ્લેખનીય છે કે તનાવ વધવાની આશંકા વચ્ચે મહિનાઓ સુધી બિડેને યુક્રેનને આવા હુમલા કરવાની મંજૂરી આપવાનો ઇનકાર કર્યો હતો. જો કે, રશિયામાં 10,000 થી વધુ ઉત્તર કોરિયાના સૈનિકોની તૈનાતીના સમાચાર પછી, અમેરિકાએ તેને મંજૂરી આપી. ડેઈલી ટેલિગ્રાફે અહેવાલ આપ્યો છે કે યુક્રેન-રશિયા યુદ્ધમાં ઉત્તર કોરિયાની દખલગીરી બાદ અમેરિકાએ તેને ગંભીરતાથી લીધો છે અને તણાવ વધવાની આશંકા પણ વ્યક્ત કરી છે. આ પછી, આ હથિયારોનો ઉપયોગ કરવાની પરવાનગી આપવામાં આવી હતી.
એજન્સીએ વધુમાં કહ્યું કે આ હુમલામાં રશિયન સેનાના મુખ્ય મિસાઈલ અને આર્ટિલરી ડિરેક્ટોરેટના રશિયન સૈન્ય મથકને નિશાન બનાવવામાં આવ્યું હતું. યુક્રેનની રાષ્ટ્રીય સુરક્ષા પરિષદના અધિકારી એન્ડ્રી કોવાલેન્કોએ જણાવ્યું હતું કે ઉત્તર કોરિયાના લોકો આર્ટિલરી હથિયારો, માર્ગદર્શિત હવાઈ બોમ્બ, વિમાન વિરોધી મિસાઈલ અને મલ્ટિપલ લોન્ચ રોકેટ સિસ્ટમ્સ (MLRS) માટે દારૂગોળો સાથે સ્થળ પર હતા.
રશિયાએ આપી હતી ચેતવણી
અગાઉ રશિયાએ આ હથિયારોનો ઉપયોગ ન કરવાની ચેતવણી આપી હતી. રશિયાએ એક દિવસ પહેલા કહ્યું હતું કે જો આ હથિયારોનો ઉપયોગ કરવામાં આવશે તો તેનાથી યુદ્ધની આગ વધુ ભડકશે અને વિશ્વ ત્રીજા વિશ્વ યુદ્ધ તરફ આગળ વધશે. બિડેનની મંજૂરી બાદ નારાજ થયેલા રશિયન રાષ્ટ્રપતિ પુતિને મંગળવારે દેશની નવી પરમાણુ નીતિ પર હસ્તાક્ષર કર્યા. આ હેઠળ, એવી જાહેરાત કરવામાં આવી છે કે પરંપરાગત મિસાઇલ ડ્રોન અને અન્ય વિમાનો દ્વારા રશિયા પરના હુમલા પણ પરમાણુ હથિયારોના ઉપયોગના માપદંડમાં આવશે.
