અમરેલી: ધુળેટી તહેવારની ઉજવણી વચ્ચે અમરેલી જિલ્લામાં માર્ગ અકસ્માતોની ઘટનાઓમાં વધારો નોંધાયો છે. અમરેલી તાલુકાના ગીરીયા ગામ નજીક માતા સાથે ચાલીને જતા 3 વર્ષના બાળકને બાઈક ચાલકે ટક્કર મારતા બાળક ગંભીર રીતે ઇજાગ્રસ્ત થયો છે.
માતા સાથે જતા બાળકને ટક્કર
માહિતી મુજબ, માતા સાથે રસ્તા પર ચાલીને જતા બાળકને ઝડપી ગતિએ આવી રહેલી બાઈકે અચાનક ટક્કર મારી હતી. અકસ્માતમાં બાળકને ગંભીર ઇજાઓ પહોંચી હતી. તાત્કાલિક તેને સારવાર માટે નજીકની હોસ્પિટલમાં ખસેડવામાં આવ્યો છે. ઈજાગ્રસ્ત બાળકનું નામ જીગ્નેશ મુકેશભાઈ બેરાણી (ઉ.વ. 3) હોવાનું જાણવા મળ્યું છે.
બાઈક પર ત્રિપલ સવારી
પ્રાથમિક માહિતી અનુસાર, બાઈક પર ત્રણ લોકો સવાર હતા. અકસ્માત બાદ બાઈક સવારનો બચાવ થયો હોવાનું જાણવા મળી રહ્યું છે. ઘટનાને લઈને સ્થાનિકોમાં રોષ જોવા મળ્યો હતો.
તહેવારો દરમિયાન સાવચેતીની જરૂર
ધુળેટી જેવા તહેવારો દરમિયાન રસ્તાઓ પર ભીડ અને અવરજવર વધતા અકસ્માતોના બનાવો વધી રહ્યા છે. પોલીસ દ્વારા વાહનચાલકોને ટ્રાફિક નિયમોનું પાલન કરવા અને બેદરકારીપૂર્વક વાહન ન હાંકવા અપીલ કરવામાં આવી છે. હાલ સમગ્ર મામલે વધુ તપાસ ચાલી રહી છે.
