PGVCL દ્વારા અમરેલી જિલ્લામાં આજે વીજ બિલ બાકી ધરાવતા ગ્રાહકો સામે કડક કાર્યવાહી શરૂ કરવામાં આવી છે. ત્રણ દિવસીય મેગા ડ્રાઇવ અંતર્ગત જિલ્લામાં શહેર અને ગામડાં બંને વિસ્તારોમાં વીજ કનેક્શન કાપવાની કામગીરી હાથ ધરાઈ છે.
29 સબ ડિવિઝનમાં 290 ટીમ તૈનાત
PGVCL દ્વારા અમરેલી જિલ્લાના 29 સબ ડિવિઝનમાં કુલ 290 ટીમોને તૈનાત કરવામાં આવી છે. દરેક ટીમ ઘર-ઘર જઈ બાકી બિલ ધરાવતા ગ્રાહકોની યાદી આધારે ચકાસણી કરી રહી છે. વિભાગના જણાવ્યા મુજબ, આજે પ્રથમ દિવસે 5,000 રૂપિયા કરતાં વધુ બાકી બિલ ધરાવતા ગ્રાહકોના વીજ કનેક્શન કાપવાની કામગીરી હાથ ધરવામાં આવી છે.
11.81 કરોડ રૂપિયાની વસુલાતનો લક્ષ્યાંક
આ મેગા ડ્રાઇવ દરમિયાન કુલ 11.81 કરોડ રૂપિયાની બાકી વસુલાત કરવાનો લક્ષ્યાંક નક્કી કરવામાં આવ્યો છે. વિભાગ દ્વારા અગાઉથી નોટિસ આપવામાં આવી હોવા છતાં બિલ નહીં ભરનાર ગ્રાહકો સામે હવે સીધી કાર્યવાહી શરૂ કરવામાં આવી છે.
ત્રણ દિવસ ચાલશે મેગા ઓપરેશન
વીજ વિભાગનું આ મેગા ઓપરેશન સતત ત્રણ દિવસ સુધી ચાલુ રહેશે. અધિકારીઓએ જણાવ્યું કે બિલ બાકી હોય તેવા ગ્રાહકો તાત્કાલિક ચુકવણી કરે તો કનેક્શન કાપવાની કાર્યવાહી ટાળી શકાય છે.
ગ્રાહકોને અપીલ
PGVCL દ્વારા ગ્રાહકોને અપીલ કરવામાં આવી છે કે સમયસર વીજબીલની ચૂકવણી કરે અને અનાવશ્યક મુશ્કેલીથી બચે. ઓનલાઇન તેમજ નજીકના કલેક્શન સેન્ટર પર ચુકવણીની સુવિધા ઉપલબ્ધ છે.
