બજેટ 2024 બાદ શેર માર્કેટ ક્રેશ, રોકાણકારોએ ગુમાવ્યા 10 લાખ કરોડ રૂપિયા…
બજેટની જાહેરાત બાદ શેરબજારમાં મોટો ઘટાડો જોવા મળી રહ્યો છે. જ્યાં સેન્સેક્સમાં દોઢ ટકાનો ઘટાડો જોવા મળી રહ્યો છે. બીજી તરફ, નિફ્ટી ટ્રેડિંગ સેશન દરમિયાન 1 ટકાના ઘટાડા સાથે કારોબાર કરતી જોવા મળી રહી છે. નિષ્ણાતોનું માનીએ તો શેરબજારમાં વધુ ઘટાડો જોવા મળી શકે છે. દેશની સૌથી મોટી કંપની રિલાયન્સ ઇન્ડસ્ટ્રીઝના શેરમાં 2 ટકાથી વધુનો ઘટાડો જોવા મળી રહ્યો છે. બીજી તરફ, SBI લગભગ બે ટકા અને L&Tના શેરમાં 4 ટકાથી વધુનો ઘટાડો જોવા મળી રહ્યો છે.
સેન્સેક્સ અને નિફ્ટીમાં મોટો ઘટાડો
બજેટની જાહેરાત બાદ શેરબજારના બંને મુખ્ય ઇંડેક્સ સેન્સેક્સ અને નિફ્ટીમાં મોટો ઘટાડો જોવા મળ્યો હતો. બોમ્બે સ્ટોક એક્સચેન્જનો મુખ્ય સૂચકાંક સેન્સેક્સ લગભગ 1200 પોઈન્ટ ઘટીને 79224.32 પોઈન્ટ પર પહોંચ્યો હતો. જોકે, સેન્સેક્સ 80,724.30 પોઈન્ટ પર ખુલ્યો હતો. બીજી તરફ નિફ્ટીમાં પણ લગભગ એક ટકાનો ઘટાડો જોવા મળી રહ્યો છે. નિફ્ટી 232.65 પોઈન્ટના ઘટાડા સાથે 24,276.60 પોઈન્ટ પર ટ્રેડ થઈ રહ્યો હતો. જોકે, નિફ્ટી 24,568.90 પોઈન્ટ પર ખુલ્યો હતો.
કયા શેરમાં મોટો ઘટાડો થયો?
બોમ્બે સ્ટોક એક્સચેન્જ પર દેશની સૌથી મોટી કંપની રિલાયન્સ ઈન્ડસ્ટ્રીઝના શેરમાં લગભગ બે ટકાનો ઘટાડો નોંધાયો છે. જેના કારણે કંપનીના શેરની કિંમત 2927.10 રૂપિયા પર પહોંચી ગઈ છે. બીજી તરફ L&Tના શેરમાં 5 ટકાથી વધુનો ઘટાડો જોવા મળ્યો છે. ઓએનજીસી અને શ્રીરામ ફાઇનાન્સના શેરમાં 3 ટકાથી વધુનો ઘટાડો છે. હિન્દાલ્કો અને બજાજ ફાઇનાન્સના શેરમાં 2.50 ટકાથી વધુનો ઘટાડો જોવા મળી રહ્યો છે.
રોકાણકારોને મોટું નુકસાન
શેરબજારમાં આવેલા આ ઘટાડાથી રોકાણકારોને થોડા જ કલાકોમાં લગભગ 10 લાખ કરોડ રૂપિયાનું નુકસાન થયું છે. રોકાણકારોનું નુકસાન અને નફો BSE ના માર્કેટ કેપ સાથે જોડાયેલ છે. એક દિવસ અગાઉ, BSEનું માર્કેટ કેપ રૂ. 4,48,32,227.50 કરોડ હતું, જે ટ્રેડિંગ સેશન દરમિયાન ઘટીને રૂ. 4,38,36,540.32 કરોડ થયું હતું. મતલબ કે રોકાણકારોને લગભગ 10 લાખ કરોડ રૂપિયાનું નુકસાન થયું છે. હાલમાં BSEનું માર્કેટ કેપ રૂ. 4,43,28,902.63 કરોડ પર દેખાઈ રહ્યું છે.
