સુરેન્દ્રનગર: જિલ્લામાં ચકચાર મચાવનાર હની ટ્રેપ કેસમાં એલસીબી (Local Crime Branch)ની ટીમે ગુનાનો ભેદ ઉકેલી આરોપીઓને ઝડપી પાડ્યા છે. સાણંદના જમીન લે-વેચના વ્યવસાય સાથે સંકળાયેલા વેપારી પાસેથી રૂ.1 કરોડની ખંડણી વસૂલવામાં આવી હતી, જેમાંથી પોલીસે ₹72,50,150ની રકમ પરત મેળવી છે.
વોટ્સએપ કોલથી શરૂ થયો હની ટ્રેપનો ખેલ
માહિતી મુજબ, સાણંદના હુસેનભાઈ અબદુલભાઈ મોમીનને ભાવના ઉર્ફે અંજલી દશરથભાઈ ચાવડાએ વોટ્સએપ કોલ દ્વારા સંપર્ક કર્યો હતો. મીઠી-મીઠી વાતો કરીને વિશ્વાસ જીત્યા બાદ યુવતીએ તેમને સુરેન્દ્રનગર મળવા બોલાવ્યા હતા. હુસેનભાઈ જમીનના કામે વારંવાર જતવાડ વિસ્તારમાં આવતા હોવાની જાણકારી આધારે જ આ જાળ ગોઠવવામાં આવી હતી.
ઘરમાં બોલાવી બનાવી ફસાવટ, અપહરણ કરીને ખંડણી
સુરેન્દ્રનગરના એક મકાનમાં મળ્યા બાદ યુવતીએ પરિસ્થિતિ એવી બનાવી કે વેપારીને શર્ટ ઉતારવા કહ્યું. એ જ સમયે અગાઉથી ઘાતમાં બેઠેલા આરોપીઓ ઘસી આવ્યા હતા. રીવોલ્વરની અણી પર વેપારીનું અપહરણ કરી તેમને અન્ય સ્થળે લઈ જવામાં આવ્યા અને રૂ.1 કરોડની ખંડણી માંગવામાં આવી. પોતાનો જીવ બચાવવા હુસેનભાઈએ રૂ.1 કરોડ રોકડ આપી દીધા, બાદમાં આરોપીઓ ફરાર થઈ ગયા હતા.
LCB ની કાર્યવાહી: આરોપીઓ ઝડપાયા, લાખો રૂપિયા પરત
આ બનાવ અંગે ફરિયાદ નોંધાતા સુરેન્દ્રનગર એલસીબીની ટીમે ઝડપી તપાસ હાથ ધરી હતી. ટેકનિકલ સર્વેલન્સ અને સૂત્રોના આધારે આરોપીઓને ઝડપી લેવામાં આવ્યા છે. આ કેસમાં ભાવના ઉર્ફે અંજલી, તોસીફ, સોહિલ, અરબાઝ અને આસીફ સામે ગુનો દાખલ કરવામાં આવ્યો છે. પોલીસે રૂ.1 કરોડમાંથી ₹72,50,150ની રકમ પરત મેળવી છે. તપાસમાં સામે આવ્યું છે કે આરોપીઓએ રકમ મળ્યા બાદ પોતાના વચ્ચે ભાગ પાડી લીધા હતા.
પૂર્વ આયોજનથી ગોઠવાયેલો ગુનો
તપાસમાં ખુલ્યું છે કે હુસેનભાઈ પાસે નાણાં હોવાની માહિતી મેળવી યુવતીને ખાસ તેમને ફસાવવા માટે તૈયાર કરવામાં આવી હતી. સમગ્ર ગુનો પૂર્વ આયોજન સાથે ગોઠવાયો હતો. પોલીસ દ્વારા આરોપીઓ સામે કાયદેસરની કાર્યવાહી હાથ ધરવામાં આવી છે અને વધુ તપાસ ચાલુ છે.
