લોકસભા ચૂંટણીના છઠ્ઠા તબક્કા માટે પશ્ચિમ બંગાળમાં 25 મેના રોજ મતદાન થશે. આ પહેલા જ નંદીગ્રામમાંથી હિંસાના અહેવાલો સામે આવ્યા છે. ભારતીય જનતા પાર્ટીની મહિલા કાર્યકરની હત્યા કરવામાં આવી હતી. ભાજપે દાવો કર્યો છે કે તેના ઘણા કાર્યકરો પર તૃણમૂલ કોંગ્રેસ (TMC) દ્વારા હુમલો કરવામાં આવ્યો હતો. ગુરુવારે નંદીગ્રામમાં BJP એ વિરોધ પ્રદર્શન કર્યું હતું.
TMCએ હિંસાના આરોપોને સંપૂર્ણપણે ફગાવી દીધા છે. મમતા બેનર્જીની પાર્ટીએ આરોપ લગાવ્યો છે કે BJPના કાર્યકર્તાઓ વચ્ચેના ઝઘડાને કારણે આ હત્યા થઈ છે.
TMCના રાષ્ટ્રીય મહાસચિવ અભિષેક બેનર્જીએ વિપક્ષી નેતા સુવેન્દુ અધિકારીના વિધાનસભા ક્ષેત્ર નંદીગ્રામની મુલાકાત લીધા બાદ હિંસાના સમાચાર આવ્યા છે. તેઓ તેમની પાર્ટીના તમલુક સીટના ઉમેદવાર દેવાંશુ ભટ્ટાચાર્ય માટે વોટ માંગવા આવ્યા હતા. બુધવારે એક રેલીને સંબોધતા અભિષેક બેનર્જીએ કહ્યું કે અનામતના લોકોના અધિકારની રક્ષા માટે BJPને સત્તામાંથી બહાર કરવાની જરૂર છે.
આ દરમિયાન તેણે શુભેન્દુ અધિકારીને “દેશદ્રોહી” ગણાવ્યા અને દાવો કર્યો કે તેઓ ED અને CBI તપાસથી બચવા માટે BJPમાં જોડાયા છે. અભિષેક બેનર્જીએ કહ્યું, “શુભેંદુ અધિકારી મેદિનીપુરની આ પવિત્ર ધરતીનો પુત્ર ન હોઈ શકે. આ સ્વતંત્રતા સેનાની સતીશ સામંત અને અન્ય ક્રાંતિકારીઓની ભૂમિ છે.
પશ્ચિમ બંગાળ પોલીસે 21-22 મે દરમિયાન પૂર્વ અને પશ્ચિમ મેદિનીપુરમાં અધિકારી અને અન્ય BJP નેતાઓ સાથે સંકળાયેલા ઘણા લોકોની શોધ કરી હતી. દરોડા બાદ BJPના એક સ્થાનિક નેતાની પણ ધરપકડ કરવામાં આવી હતી. આ ધરપકડ બાદ સમગ્ર વિસ્તારમાં રોષ ફેલાયો હતો. ભાજપે પશ્ચિમ બંગાળના મુખ્યમંત્રી અને TMC સુપ્રીમો મમતા બેનર્જી પર છઠ્ઠા તબક્કાના મતદાન પહેલા તેના કાર્યકરોને ડરાવવાનો પ્રયાસ કરવાનો આરોપ લગાવ્યો છે.
