મહુવા શહેરમાં ગેસ સિલિન્ડર બ્લાસ્ટની ગંભીર ઘટના સામે આવી છે. મહુવાના લાતીબજાર વિસ્તારમાં આવેલ એક મકાનમાં ગેસ સિલિન્ડર અચાનક ફાટતા ભીષણ આગ ભભૂકી ઉઠી હતી. ઘટનામાં 4 લોકોને ઈજા પહોંચી છે, જેમાંથી 3ની હાલત ગંભીર હોવાનું જાણવા મળ્યું છે.
લાતીબજાર વિસ્તારમાં અચાનક બ્લાસ્ટ
પ્રાપ્ત માહિતી મુજબ, લાતીબજાર નજીક આવેલા રહેણાંક મકાનમાં ગેસ સિલિન્ડરનો અચાનક વિસ્ફોટ થયો હતો. બ્લાસ્ટ એટલો જોરદાર હતો કે મકાનમાં આગ ફાટી નીકળી અને આજુબાજુના બે થી ત્રણ ઘરોને પણ નુકસાન પહોંચ્યું હોવાની પ્રાથમિક માહિતી મળી રહી છે.
4 ઈજાગ્રસ્ત, 3ની હાલત ગંભીર
બ્લાસ્ટના પગલે મકાનમાં રહેલા 4 લોકો ઈજાગ્રસ્ત થયા હતા. ઘટનાની જાણ થતા તાત્કાલિક ફાયર વિભાગ અને ઈમરજન્સી ટીમો સ્થળ પર પહોંચી હતી. 3 ગંભીર રીતે દાઝેલા લોકોને તાત્કાલિક સારવાર માટે હોસ્પિટલમાં ખસેડવામાં આવ્યા છે, જ્યારે એકને સામાન્ય ઈજા થઈ હોવાનું જાણવા મળ્યું છે.
ફાયર વિભાગે ભારે જહેમત બાદ આગ કાબૂમાં લીધી
ફાયર ફાઇટરોએ ઘટના સ્થળે પહોંચી આગ પર કાબૂ મેળવવા માટે રેસ્ક્યુ ઓપરેશન હાથ ધર્યું હતું. ભારે મહેનત બાદ આગને કાબૂમાં લેવામાં સફળતા મળી હતી. આગના કારણે આસપાસના વિસ્તારમાં અફરાતફરીનો માહોલ સર્જાયો હતો.
બ્લાસ્ટ બાદ લોકોના ટોળા ઉમટ્યા
ઘટનાના અવાજથી આસપાસના લોકો ભયભીત બની ગયા હતા અને સ્થળ પર ટોળા ઉમટી પડ્યા હતા. હાલ પોલીસે વિસ્તારને કોર્ડન કરી વધુ તપાસ હાથ ધરી છે. ગેસ સિલિન્ડર બ્લાસ્ટ પાછળનું ચોક્કસ કારણ જાણવા તપાસ શરૂ કરવામાં આવી છે.
