હવામાન વિભાગ દ્વારા જાહેર કરાયેલા રેડ એલર્ટ વચ્ચે અમરેલી જિલ્લામાં શનિવારે સવારથી જ વરસાદી માહોલ જામ્યો છે. જિલ્લાના વિવિધ વિસ્તારોમાં ધીમીધારે પરંતુ સતત વરસાદ વરસી રહ્યો છે, જ્યારે દરિયાકાંઠાના રાજુલા અને જાફરાબાદ પંથકમાં અવિરત વરસાદ નોંધાતા જનજીવન પર અસર જોવા મળી રહી છે.
ભારે વરસાદની આગાહીને પગલે જિલ્લા વહીવટી તંત્ર સંપૂર્ણ એલર્ટ મોડમાં આવી ગયું છે. સંભવિત પરિસ્થિતિને પહોંચી વળવા માટે તમામ સંબંધિત વિભાગોને સતર્ક રહેવા સૂચના આપવામાં આવી છે અને સમગ્ર પરિસ્થિતિ પર સતત નજર રાખવામાં આવી રહી છે.
જિલ્લાના નીચાણવાળા તેમજ સંવેદનશીલ વિસ્તારોમાં ખાસ દેખરેખ રાખવામાં આવી રહી છે. કોઈપણ પ્રકારની અનિચ્છનીય સ્થિતિ સર્જાય તો તાત્કાલિક કાર્યવાહી થઈ શકે તે માટે તંત્ર દ્વારા જરૂરી વ્યવસ્થાઓ કરવામાં આવી છે.
જિલ્લા વહીવટીતંત્રે નાગરિકોને અપીલ કરી છે કે ભારે વરસાદ દરમિયાન બિનજરૂરી મુસાફરી ટાળે, નદી-નાળા અને દરિયાકાંઠાના વિસ્તારોની નજીક જવાનું ટાળે તેમજ સત્તાવાર સૂચનાઓનું પાલન કરે. આગામી કલાકોમાં પણ વરસાદનું જોર યથાવત રહેવાની શક્યતા વ્યક્ત કરવામાં આવી છે.
