જામનગર: શહેરના મયુરનગર નજીક આવેલા સાત માળીયા આવાસમાં રહેણાક મકાનમાં અચાનક આગ લાગવાની ઘટના સામે આવી છે. મકાનમાં રહેલા ઘરવખરીના સામાનમાં કોઈ કારણસર આગ ભભૂકી ઉઠતાં આસપાસના વિસ્તારમાં થોડા સમય માટે અફરાતફરીનો માહોલ સર્જાયો હતો.
આગની જાણ થતાં જ ફાયર બ્રિગેડને જાણ કરવામાં આવી હતી. ઘટનાની માહિતી મળતા ફાયર બ્રિગેડની ટીમ તાત્કાલિક સ્થળ પર પહોંચી ગઈ હતી અને આગને કાબૂમાં લેવા માટે કામગીરી શરૂ કરી હતી.
ફાયર બ્રિગેડના જવાનોએ પાણીનો મારો ચલાવી આગ પર કાબૂ મેળવ્યો હતો. સમયસર હાથ ધરાયેલી કામગીરીના કારણે આગ વધુ ફેલાતી અટકાવવામાં આવી હતી.
આ ઘટનામાં સદનસીબે કોઈ જાનહાનિ થઈ નથી. જોકે આગને કારણે મકાનમાં રહેલો ઘરવખરીનો સામાન બળીને નુકસાન થયું હોવાનું જાણવા મળ્યું છે. આગ કયા કારણોસર લાગી તે અંગેની વધુ વિગતો તપાસ બાદ સામે આવશે.
