જુનાગઢ: ભાવનગરમાં બનેલા લઠ્ઠાકાંડના મુદ્દે કોંગ્રેસ દ્વારા જુનાગઢમાં વિરોધ પ્રદર્શન કરવામાં આવ્યું હતું. કોંગ્રેસના આગેવાનો અને કાર્યકરોએ સરકાર સામે વિરોધ નોંધાવવા માટે કોંગ્રેસ ભવનથી ગાંધી ચોક સુધી રેલી યોજવાનો પ્રયાસ કર્યો હતો.
કોંગ્રેસના જણાવ્યા મુજબ, વિરોધ પ્રદર્શન શાંતિપૂર્ણ રીતે યોજવામાં આવી રહ્યું હતું. જોકે, કોંગ્રેસ ભવનથી પ્રદર્શનકારીઓ આગળ વધ્યા બાદ થોડા જ અંતરે પોલીસ દ્વારા આગેવાનો અને કાર્યકરોને અટકાવવામાં આવ્યા હતા.
પ્રદર્શન દરમિયાન કોંગ્રેસ શહેર પ્રમુખ મનોજ જોશી, જિલ્લા પ્રમુખ અમિત પટેલ, જોલીત બુસા સહિતના આગેવાનો અને કાર્યકરોની અટકાયત કરવામાં આવી હોવાનો કોંગ્રેસ દ્વારા દાવો કરવામાં આવ્યો છે.
કોંગ્રેસે આ કાર્યવાહી સામે સવાલ ઉઠાવતા સરકાર અને ભાજપ સામે આકરા પ્રહારો કર્યા હતા. કોંગ્રેસના આગેવાનોનું કહેવું છે કે લોકશાહી પદ્ધતિથી વિરોધ નોંધાવવાનો અધિકાર હોવા છતાં પ્રદર્શનને આગળ વધવા દેવામાં આવ્યું નથી.
આ ઘટનાને લઈને જુનાગઢના રાજકીય વર્તુળોમાં ચર્ચા તેજ બની છે. ભાવનગર લઠ્ઠાકાંડના મુદ્દે કોંગ્રેસે સરકારને ઘેરવાનો પ્રયાસ કર્યો છે, ત્યારે જુનાગઢમાં થયેલી અટકાયતને લઈને પક્ષ દ્વારા આગામી દિવસોમાં વધુ વિરોધ કાર્યક્રમો યોજાય તેવી શક્યતા છે.
