રાજકોટ જિલ્લાના ધોરાજી તાલુકાના સુપેડી ગામમાંથી ખેડૂતો સાથે સંકળાયેલા ગંભીર મામલાનો ખુલાસો થયો છે. પોસ્ટ ઓફિસ રોડ પર આવેલી ‘શિવ શક્તિ એગ્રો’ નામની દુકાનમાં રાજકોટ ગ્રામ્ય લોકલ ક્રાઇમ બ્રાન્ચ (LCB) દ્વારા કાર્યવાહી કરવામાં આવતા શંકાસ્પદ જંતુનાશક દવાનો મોટો જથ્થો મળી આવ્યો હોવાની માહિતી સામે આવી છે.
મળતી માહિતી મુજબ, દુકાનદાર બ્રિજેશભાઈ રમણીકભાઈ ભાલોડી દ્વારા ખેડૂતોને વેચાણ માટે ડુપ્લીકેટ અથવા શંકાસ્પદ હોવાનું જણાતું જંતુનાશક દવાનું સ્ટોક રાખવામાં આવ્યો હોવાની શંકાના આધારે પોલીસે કાર્યવાહી કરી હતી.
રેડ દરમિયાન 71 બોટલો મળી
રાજકોટ ગ્રામ્ય LCBની ટીમે ‘શિવ શક્તિ એગ્રો’ ખાતે તપાસ હાથ ધરતા વિવિધ બ્રાન્ડના નામે વેચાતી શંકાસ્પદ જંતુનાશક દવાનો જથ્થો મળી આવ્યો હતો. પોલીસ કાર્યવાહી દરમિયાન કુલ 71 નાની-મોટી બોટલો કબ્જે લેવામાં આવી હોવાનું જાણવા મળે છે.
જપ્ત કરાયેલા જથ્થામાં રિયલ બાયો સાયન્સની ‘કેર પ્લસ’ (CARE PLUS) તેમજ સુરક્ષા બાયો કેરની ‘ઉજાલા’ (UJALA) બ્રાન્ડના નામે વેચાતી જંતુનાશક દવાનો સમાવેશ થાય છે.
પોલીસ દ્વારા કબ્જે કરાયેલા સમગ્ર મુદ્દામાલની કુલ કિંમત અંદાજે રૂ. 95,505 હોવાનું જણાવવામાં આવ્યું છે.
ખેડૂતોના હિતને લઈને ગંભીર સવાલો
ખેડૂતો ખેતીમાં પાકને જીવાત અને રોગોથી બચાવવા માટે જંતુનાશક દવાઓનો ઉપયોગ કરે છે. આવા સંજોગોમાં દવાની ગુણવત્તા અને અસલિયત અંગે કોઈ ગેરરીતિ થાય તો તેનો સીધો પ્રભાવ ખેતી અને ખેડૂતોના ખર્ચ પર પડી શકે છે.
આ મામલે પોલીસ દ્વારા દવાનો જથ્થો કબ્જે કરી તેની હકીકત અંગે વધુ તપાસ હાથ ધરવામાં આવી રહી છે. દવાઓ ખરેખર ડુપ્લીકેટ છે કે અન્ય કોઈ પ્રકારની ગેરરીતિ છે, તે અંગેની સત્તાવાર તપાસ બાદ જ સ્પષ્ટતા થઈ શકશે.
ધોરાજી પોલીસ સ્ટેશનમાં જાણવાજોગ નોંધ
LCBની કાર્યવાહી બાદ તમામ મુદ્દામાલ કાયદેસરની કાર્યવાહી માટે કબ્જામાં લેવામાં આવ્યો હતો. ત્યારબાદ ધોરાજી પોલીસ સ્ટેશનમાં જાણવાજોગ રજીસ્ટર દાખલ કરાવી આગળની તપાસ શરૂ કરવામાં આવી છે.
પોલીસ હવે શંકાસ્પદ જંતુનાશક દવાનો જથ્થો ક્યાંથી આવ્યો, તેનો સપ્લાય કોના મારફતે થયો અને ખેડૂતો સુધી તેનું વેચાણ કેવી રીતે કરવામાં આવતું હતું તે સહિતના મુદ્દાઓની તપાસ કરી શકે છે.
આ સમગ્ર કાર્યવાહીથી સુપેડી સહિત આસપાસના વિસ્તારમાં કૃષિ ક્ષેત્રે વેચાતી દવાઓની ગુણવત્તા અને વેચાણ વ્યવસ્થાને લઈને પણ ચર્ચા શરૂ થઈ છે. તપાસ પૂર્ણ થયા બાદ જ સમગ્ર મામલાની વધુ હકીકતો સામે આવશે.
