નેપાળમાં બુધવારે આવેલા વિનાશક ફ્લેશ ફ્લડ બાદ ભારે તારાજી સર્જાઈ છે. ભોટેકોશી અને ત્રિશુલી નદીમાં આવેલા પૂરના કારણે અનેક ગામો, રસ્તાઓ, પુલો અને હાઇડ્રોપાવર પ્રોજેક્ટને ભારે નુકસાન થયું છે. નેપાળ પોલીસના તાજા આંકડા મુજબ પૂર અને તેના કારણે સર્જાયેલી આપત્તિમાં અત્યાર સુધીમાં 270 મૃતદેહો મળી આવ્યા છે, જ્યારે 826 લોકો હજુ સંપર્કવિહોણા છે.
288 ભારતીય નાગરિકો સંપર્કવિહોણા
નેપાળની આપત્તિ વચ્ચે ભારતીય નાગરિકોની સ્થિતિને લઈને પણ ચિંતા વધી છે. ભારતના વિદેશ મંત્રાલય (MEA)ના પ્રવક્તા રણધીર જયસ્વાલે જણાવ્યું છે કે નેપાળમાં 288 ભારતીય નાગરિકો સંપર્કમાં નથી. આ નાગરિકોને અલગ-અલગ પાંચ જૂથોમાં વહેંચવામાં આવ્યા છે. આમાં ત્રિશુલી-1 પાવર પ્રોજેક્ટના 73 કામદારો ઉપરાંત કૈલાશ માનસરોવર યાત્રા સાથે સંકળાયેલા ભારતીયો અને અન્ય રાજ્યોના નાગરિકોનો સમાવેશ થાય છે. ભારત સરકાર નેપાળના સત્તાવાળાઓ સાથે સતત સંપર્કમાં રહીને બચાવ અને રાહત કામગીરીનું સંકલન કરી રહી છે.
21 ભારતીય યાત્રાળુઓનું રેસ્ક્યૂ
MEA અનુસાર નેપાળમાં ફસાયેલા તમિલનાડુના 21 ભારતીય નાગરિકોને સુરક્ષિત રીતે બચાવી લેવામાં આવ્યા છે. આ લોકો કૈલાશ માનસરોવર યાત્રા માટે નેપાળ પહોંચ્યા હતા અને પૂરના કારણે ફસાઈ ગયા હતા. બચાવ ટીમોએ તેમને સુરક્ષિત સ્થળે પહોંચાડ્યા છે.
ચીન તરફ 200 જેટલા ભારતીયો ફસાયા હોવાની માહિતી
પૂર બાદ કેટલાક ભારતીય નાગરિકો ચીનની સરહદ તરફ ફસાયા હોવાની પણ માહિતી સામે આવી છે. MEA મુજબ લગભગ 200 ભારતીયો ચીન તરફ મદદની રાહ જોઈ રહ્યા છે. ભારતીય સત્તાવાળાઓ આ નાગરિકોની મદદ માટે સંબંધિત સત્તાવાળાઓ સાથે સંપર્કમાં છે.
644 પ્રવાસીઓ હજુ ગુમ
નેપાળ ટુરિઝમ બોર્ડના 27 ઓગસ્ટના બપોરના અપડેટ મુજબ કુલ 644 પ્રવાસીઓ હજુ લાપતા છે. તેમાં 517 વિદેશી પ્રવાસીઓ અને 127 નેપાળી નાગરિકોનો સમાવેશ થાય છે. વિદેશી પ્રવાસીઓમાં સૌથી વધુ 178 ભારતીયોનો સમાવેશ થાય છે. ત્યારબાદ અમેરિકાના 65, યુક્રેનના 53, મલેશિયાના 51, ઓસ્ટ્રેલિયાના 35, બ્રિટનના 33 અને કેનેડાના 25 નાગરિકોનો સમાવેશ થાય છે.
સદગુરુના કૈલાશ યાત્રા જૂથના સભ્યો પણ ગુમ
કૈલાશ માનસરોવર યાત્રા દરમિયાન અનેક ભારતીય યાત્રાળુઓ પૂર અને ભૂસ્ખલનની ઝપેટમાં આવ્યા છે. રિપોર્ટ્સ અનુસાર આધ્યાત્મિક સંસ્થા Isha Foundation સાથે સંકળાયેલા આશરે 80 લોકો ગુમ હોવાની માહિતી સામે આવી છે. ઘટનાની ગંભીરતાને જોતા બચાવ કામગીરી માટે ચીનની સત્તાવાળાઓ સાથે સંપર્ક સાધવામાં આવી રહ્યો છે.
નેપાળમાં વ્યાપક વિનાશ
ભોટેકોશી નદીમાં આવેલા અચાનક પૂરના પાણી સાથે કાદવ અને મોટા પ્રમાણમાં કાટમાળ ધસી આવતા નદી કિનારાના વિસ્તારોમાં ભારે નુકસાન થયું છે. અનેક મકાનો, વાહનો અને પુલો તણાઈ ગયા છે. હાઇડ્રોપાવર પ્રોજેક્ટ અને અન્ય મહત્વપૂર્ણ માળખાને પણ નુકસાન થયું છે. બચાવ કામગીરી દરમિયાન અનેક સુરક્ષા કર્મચારીઓ પણ લાપતા થયા છે.
33 દેશોના નાગરિકો અસરગ્રસ્ત
નેપાળ ટુરિઝમ બોર્ડના આંકડા મુજબ ગુમ થયેલા વિદેશી પ્રવાસીઓમાં 30થી વધુ દેશોના નાગરિકો સામેલ છે. ભારત ઉપરાંત અમેરિકા, યુક્રેન, મલેશિયા, ઓસ્ટ્રેલિયા, બ્રિટન, કેનેડા, સિંગાપોર, જર્મની, રશિયા, ફ્રાન્સ સહિત અનેક દેશોના પ્રવાસીઓનો સંપર્ક તૂટી ગયો છે.
બચાવ કામગીરી યુદ્ધના ધોરણે
નેપાળના રાસુવા, નુવાકોટ, ધાદિંગ અને ગોરખા સહિતના અસરગ્રસ્ત વિસ્તારોમાં સુરક્ષા દળો, સ્થાનિક તંત્ર, ટુરિસ્ટ પોલીસ અને અન્ય બચાવ ટીમો દ્વારા સર્ચ અને રેસ્ક્યૂ ઓપરેશન ચાલી રહ્યું છે. મુશ્કેલ ભૂગોળ, નદીમાં રહેલો કાટમાળ અને નુકસાન પામેલા રસ્તા-પુલને કારણે બચાવ કામગીરીમાં પડકારો ઊભા થયા છે. ભારત સરકાર પણ નેપાળના સત્તાવાળાઓ સાથે સંકલન કરી રહી છે અને અસરગ્રસ્ત ભારતીય નાગરિકોને શોધવા તથા જરૂરી સહાય પહોંચાડવા માટે પ્રયાસો ચાલુ છે. સ્થિતિ સતત બદલાઈ રહી હોવાથી મૃતકો અને ગુમ થયેલા લોકોના આંકડામાં વધારો-ઘટાડો થઈ શકે છે.
