નેપાળમાં વિનાશક પૂર અને ભારે વરસાદ બાદ સ્થિતિ ગંભીર બની છે. આ કુદરતી આફત વચ્ચે ભારતીય નાગરિકોની સ્થિતિ અંગે ભારતના વિદેશ મંત્રાલય (MEA)એ મહત્વપૂર્ણ માહિતી જાહેર કરી છે. MEA મુજબ હાલમાં 320 ભારતીય નાગરિકોનો સંપર્ક થઈ શક્યો નથી, જ્યારે ચીન તરફ ફસાયેલા 400 ભારતીય નાગરિકો સુરક્ષિત હોવાનું જાણવા મળ્યું છે.

નવી દિલ્હીમાં યોજાયેલી દ્વિ-સાપ્તાહિક પ્રેસ બ્રીફિંગ દરમિયાન વિદેશ મંત્રાલયના પ્રવક્તા રણધીર જયસ્વાલે બચાવ કામગીરી અંગે માહિતી આપી હતી. તેમના જણાવ્યા અનુસાર અત્યાર સુધીમાં 84 ભારતીય નાગરિકોને સુરક્ષિત રીતે બહાર કાઢવામાં આવ્યા છે.

ત્રિશુલી-1 પ્રોજેક્ટના 63 ભારતીયો બચાવાયા

બચાવાયેલા ભારતીયોમાં ત્રિશુલી-1 હાઇડ્રોપાવર પ્રોજેક્ટ સાથે સંકળાયેલા 63 ભારતીય નાગરિકોનો પણ સમાવેશ થાય છે. આ ઉપરાંત પૂરગ્રસ્ત વિસ્તારમાંથી કાઠમંડુ પહોંચેલા તમિલનાડુના 21 ભારતીય નાગરિકો પણ હવે દિલ્હી પહોંચી ગયા છે.

MEAના જણાવ્યા પ્રમાણે આ 21 ભારતીયો અગાઉ કાઠમંડુ પહોંચ્યા હતા. ભારતના રાજદૂતે કાઠમંડુમાં તેમની મુલાકાત લઈને તેમની સ્થિતિ અને સ્વાસ્થ્ય અંગે માહિતી મેળવી હતી.

ચીન તરફ ફસાયેલા 96 ભારતીયો નેપાળ પહોંચ્યા

પૂરની અસર ચીન તરફના વિસ્તારોમાં પણ જોવા મળી રહી છે. MEA અનુસાર ચીન બાજુ ફસાયેલા 96 ભારતીય નાગરિકો જમીન માર્ગે સુરક્ષિત રીતે નેપાળ પહોંચી ગયા છે. હવે તેમને ત્યાંથી ભારત પરત લાવવા માટે જરૂરી વ્યવસ્થા કરવામાં આવી રહી છે.

બીજી તરફ ચીનમાં હજુ 400 ભારતીય નાગરિકો સુરક્ષિત હોવાનું વિદેશ મંત્રાલયે જણાવ્યું છે. ભારતીય દૂતાવાસ સ્થાનિક સત્તાવાળાઓ સાથે સંકલન કરીને આ લોકોને સુરક્ષિત રીતે બહાર કાઢવા માટે કામગીરી કરી રહ્યું છે.

320 ભારતીયોનો હજુ સંપર્ક નથી

આ સમગ્ર ઘટનામાં સૌથી મોટી ચિંતા એ છે કે 320 લોકોનો હજુ સંપર્ક થઈ શક્યો નથી અથવા તેઓ ગુમ છે. MEAએ જણાવ્યું છે કે આ યાદીમાં એવા ભારતીય મૂળના લગભગ 100 લોકો પણ સામેલ છે, જેમની પાસે અન્ય દેશોની નાગરિકતા છે અને જેઓ કદાચ કૈલાશ માનસરોવર યાત્રા માટે ગયા હોઈ શકે છે.

પરિસ્થિતિ પર સતત નજર રાખવા માટે ભારતે કંટ્રોલ રૂમ સક્રિય રાખ્યો છે. MEAનો કંટ્રોલ રૂમ 24 કલાક કાર્યરત છે. કાઠમંડુ અને બેઇજિંગમાં આવેલા ભારતીય દૂતાવાસોના કંટ્રોલ રૂમ પણ સતત સંપર્ક અને બચાવ પ્રયાસોમાં જોડાયેલા છે.

નેપાળમાં મૃત્યુઆંક 538 પર પહોંચ્યો

નેપાળની નેશનલ ડિઝાસ્ટર રિસ્ક રિડક્શન એન્ડ મેનેજમેન્ટ ઓથોરિટી (NDRRMA)ના તાજેતરના આંકડા પ્રમાણે ભોટેકોશી વિસ્તારમાં આવેલા વિનાશક પૂર અને તેની અસરથી મૃત્યુઆંક વધીને 538 થયો છે. આ ઉપરાંત હજુ પણ મોટી સંખ્યામાં લોકો ગુમ હોવાનું જણાવાયું છે. ભારતીય નાગરિકોની શોધખોળ, બચાવ અને પરત લાવવાની કામગીરી વચ્ચે MEA તથા બંને દેશોમાં ભારતીય મિશન પરિસ્થિતિ પર સતત નજર રાખી રહ્યા છે.

News Hotspot સાથે જોડાવવા અહી ક્લિક કરો`

Facebook સાથે જોડાવા અહી ક્લિક કરો

 Instagram સાથે જોડાવા અહી ક્લિક કરો

Twitter સાથે જોડાવા અહી ક્લિક કરો

Whatsapp ચેનલમાં જોડાવા અહી ક્લિક કરો
Website સાથે જોડાવા અહી ક્લિક કરો