નવી દિલ્હી: ટ્વિટર હવે X છે. X.com લિન્ક પર જવાથી તમે Twitter પર પહોંચશો. એલન મસ્કે ફરી ટ્વિટરનો લોગો બદલી નાંખ્યો છે. હવે તમે પક્ષીની જગ્યાએ X જોશો. હવે તમે ટ્વિટ નહીં કરો, કદાચ તમે Xweet કરશો. ટ્વિટરના માલિક એલન મસ્કે ટ્વિટર બ્રાન્ડને સમાપ્ત કરવાની તૈયારીઓ પૂર્ણ કરી છે અને હવે આ માઇક્રો-બ્લોગિંગ પ્લેટફોર્મનો નવો યુગ શરૂ થયો છે.
હવે ટ્વિટરના લોગો અને નામ સાથે એક નવું URL (X.com) પણ આવ્યું છે. હવે યુઝર્સના મનમાં અનેક સવાલો ઉઠયા છે. X લાવવા પાછળ એલોન મસ્કની મોટી યોજના છે. વ્યાપક રીતે કહીએ તો, તેમણે આ પ્લેટફોર્મથી મહત્તમ આવક ઊભી કરવી પડશે.
મસ્કે ટ્વિટર ખરીદતી વખતે જ પોતાના પ્લાન અંગે કહ્યું હતું. તેણે કહ્યું હતું કે ટ્વિટર ખરીદવું એ Xની શરૂઆત તરફ એક મોટું પગલું સાબિત થશે. ટ્વિટર ઘણા સમયથી ખોટમાં છે અને એલોન મસ્કે તેને ઘણા પૈસા આપીને ખરીદ્યું છે. એટલે દેખીતી રીતે મસ્ક તેમાંથી સારા પૈસા કમાવવાની આશા પણ રાખશે. પરંતુ તે એ પણ જાણે છે કે આ કામ ફક્ત ટ્વિટરથી થઈ શકે નહીં, તેથી તેણે તેની વ્યૂહરચના અનુસાર મોટા ફેરફારો કરવાનું શરૂ કર્યું છે. ટ્વિટર વેરીફાઈ માટે ટ્વિટર બ્લુની શરૂઆત અને હવે આ નવી તૈયારી શરુ થઈ છે.
એલોન મસ્કએ કહ્યું હતુ કે,ટૂંક સમયમાં ટ્વિટર બ્રાન્ડને ખતમ કરવામાં આવશે અને તેને X સાથે બદલવામાં આવશે. આ પછી,તેણે નવા લોગોની ડિઝાઇન પણ બહાર પાડી.
એપ્રિલથી જ ફેરફારો શરુ થયા હતા.
એલોન મસ્ક X નામના પ્લેટફોર્મ પર માત્ર ટ્વિટર જ નહીં પરંતુ અન્ય સેવાઓ પણ આપશે. એલોન મસ્કે ઘણા સમય પહેલા ટ્વિટરને X કોર્પમાં રૂપાંતરિત કર્યું હતું. આ વર્ષે એપ્રિલથી, ટ્વિટરે તેના ભાગીદારોને સત્તાવાર વ્યવહાર માટે X કોર્પ નામનો ઉપયોગ કરવાનું કહ્યું હતું.
X સુપર એપ બનશે ?
એલોન મસ્કને ચીની એપ વી ચેટ ખૂબ જ પસંદ છે અને તેણે ઘણા સમય પહેલા કહ્યું હતું કે તે વી ચેટ જેવું કંઈક લાવવા માંગે છે. તમને જણાવી દઈએ કે WeChat એ ચીનની એક સુપર એપ છે જ્યાં તમામ પ્રકારની સેવાઓ ઉપલબ્ધ છે. સુપર એપનો ખ્યાલ એ છે કે એક એપમાં વિવિધ સેવાઓ. જેમ કે સોશિયલ મીડિયા, પેમેન્ટ સર્વિસ, ટિકિટ બુકિંગ સર્વિસ, ગેમિંગ સર્વિસ અને અન્ય ઉપયોગિતા આધારિત સેવા પૂરી પાડવામાં આવે છે. X.com પર માત્ર Twitter જ નહીં પરંતુ Elon Musk તેની અન્ય કંપનીઓને પણ રીડાયરેક્ટ કરી શકે છે. ટેસ્લા, સ્પેસએક્સ, ન્યુરાલિંક, ધ બોરિંગ કંપનીથી સ્ટારલિંક સુધી, એલોન મસ્ક તેના અન્ય પ્રોજેક્ટ્સને પણ X.com ડોમેન પર શિફ્ટ કરી શકે છે. એટલે કે X.com ખોલવા પર એલોન મસ્કની તમામ કંપનીઓનું ઈન્ટરફેસ ખુલી શકે છે. જોકે આ હજુ સ્પષ્ટ નથી. એલોન મસ્કએ કહ્યું છે કે X એ એક એવો શબ્દ છે જ્યાં બધું જ કરી શકાય છે. આવનારા સમયમાં X પ્લેટફોર્મ પર ઘણી અલગ-અલગ સેવાઓ પૂરી પાડવામાં આવી શકે છે.
હવે તે સત્તાવાર રીતે માઇક્રો બ્લોગિંગ વેબસાઇટનો નવો યુગ શરૂ થયો છે. જૂના લોગો અને બ્રાંડને ધીમે ધીમે સંપૂર્ણપણે દૂર કરવામાં આવશે. એલોન મસ્કે પોતાના કર્મચારીઓને આંતરિક ઈમેલમાં ટ્વિટરને બદલે X નામનો ઉપયોગ કરવા કહ્યું છે.હાલમાં નવા યુઝર ઈન્ટરફેસ વિશે કંઈ કહેવામાં આવ્યું નથી. પરંતુ ટૂંક સમયમાં કંપની એક નવું યુઝર ઇન્ટરફેસ લાવી શકે છે.
આ રીતે શરુ થયું x.com
એક ટ્વીટમાં મસ્કે કહ્યું કે તેને X અક્ષર પસંદ છે. પણ આ વાત અત્યારે નથી. ઘણી જૂની છે. વર્ષ 1999માં, એલોન મસ્કએ X.com ની શરૂઆત કરી, જોકે તેઓ તેમાં સહ-સ્થાપક તરીકે હતા. બાદમાં તેને મસ્ક દ્વારા તેના અન્ય સ્ટાર્ટઅપ પેપાલ સાથે મર્જ કરવામાં આવ્યું હતું. Paypal હાલમાં વિશ્વના સૌથી મોટા પેમેન્ટ ગેટવેમાંથી એક છે. જો કે, 2017 માં, એલોન મસ્કે PayPal પાસેથી X.com ડોમેન ખરીદ્યું. હવે ટ્વિટરને X.com પર રીડાયરેક્ટ કરવામાં આવ્યું છે. એટલે કે, જો તમે બ્રાઉઝરમાં X.com ખોલો છો, તો તમે Twitter (X) પર જશો.
યુઝર્સ કરી રહ્યાં છે નાપસંદ
ટ્વિટરમાં કરવામાં આવી રહેલા આ મોટા ફેરફારને ઘણા લોકો પસંદ નથી કરી રહ્યા. સોશિયલ મીડિયા પર લોકો આ બદલાવ માટે ઈલોન મસ્કની ટીકા પણ કરી રહ્યા છે. લોકો કહે છે કે આ ખૂબ જ મૂંઝવણભર્યું છે અને તેના કારણે વપરાશકર્તાઓ આ પ્લેટફોર્મથી દૂર જશે. વિવિધ મીમ્સ પણ શેર કરવામાં આવી રહ્યા છે, જ્યાં લખવામાં આવી રહ્યું છે કે ઇલોન મસ્કે ટ્વિટરનું નામ ભૂંસી નાખવાનો કોન્ટ્રાક્ટ લીધો હતો, જે હવે પૂર્ણ થઈ ગયો છે. RIP ટ્વિટર લખ્યા પછી પણ લાખો ટ્વિટ કરવામાં આવી રહી છે. જોકે કેટલાક યુઝર્સ એવું પણ કહે છે કે એલોન મસ્ક એક સ્વપ્નદ્રષ્ટા બિઝનેસમેન છે અને તે એટલા સ્માર્ટ છે કે તે જાણે છે કે તે શું કરી રહ્યો છે. ભલે શરૂઆતમાં લોકો તેની ટીકા કરે, પરંતુ ધીમે ધીમે લોકોને ટ્વિટરમાં આ મોટો બદલાવ ગમશે અને યુઝર્સ વધશે
યુઝર્સ મૂંઝવણમાં પણ છે
એક્સના આવ્યા બાદ હવે ટ્વિટર યુઝર્સ વિચારી રહ્યા છે કે ટ્વીટ કોને કહે. તેમાંથી ઘણા કહી રહ્યા છે કે Xweetને બોલાવવામાં આવશે, જ્યારે કેટલાક યુઝર્સનું કહેવું છે કે Xweet મધુર લાગે છે અને મજા પણ આવશે. ટ્વિટરને શું કહેવામાં આવશે? શું ટ્વિટર યુઝર્સ પોતાને એક્સ યુઝર્સ કહેશે… એવા ઘણા સવાલો છે જેનો હજુ કોઈ જવાબ નથી.
