રાજકોટ: શહેરમાં એનાલોગ પનીરના વેચાણને લઈને ફરી એકવાર ગંભીર પ્રશ્નો ઊભા થયા છે. ફૂડ વિભાગે 25 જૂને લાતી પ્લોટ વિસ્તારમાં આવેલી ફોર્ચ્યુન પનીર પેઢી સામે કાર્યવાહી કરીને એકમને સીલ કર્યું હતું. જોકે હવે એ જ કારખાનું ફરીથી ધમધમતું હોવાના આક્ષેપો સામે આવ્યા છે, જેના કારણે ફૂડ વિભાગની કાર્યવાહી અને દેખરેખ પર સવાલો ઉઠી રહ્યા છે.
માહિતી મુજબ, પ્રતિબંધની ચર્ચાઓ છતાં બજારમાં હજુ પણ આશરે ₹450 પ્રતિ કિલોના ભાવે એનાલોગ પનીરનું વેચાણ થઈ રહ્યું હોવાનો દાવો કરવામાં આવી રહ્યો છે. વેપારીઓ તરફથી એવી દલીલ કરવામાં આવી રહી છે કે એનાલોગ પનીર અંગે કોઈ સત્તાવાર જાહેરનામું બહાર પડ્યું નથી, તેથી વેચાણ ચાલુ રાખવામાં આવી રહ્યું છે.
બીજી તરફ, આરોગ્ય વિભાગના જવાબોથી પણ અનેક પ્રશ્નો ઊભા થયા છે. જો કારખાનું સીલ કરવામાં આવ્યું હતું તો તે ફરી શરૂ કેવી રીતે થયું? જો વેચાણ પર નિયંત્રણ લાદવાનો હેતુ હતો તો બજારમાં એનાલોગ પનીર હજુ પણ ખુલ્લેઆમ કેવી રીતે વેચાઈ રહ્યું છે? કાર્યવાહી બાદ દેખરેખ રાખવાની જવાબદારી કોની હતી?
આ સમગ્ર મામલે સ્થાનિક લોકોમાં પણ ચિંતા જોવા મળી રહી છે. આરોગ્ય સાથે ચેડાં થવાના આક્ષેપો વચ્ચે લોકો તંત્ર પાસેથી સ્પષ્ટતા અને કડક કાર્યવાહી કરવાની માંગ કરી રહ્યા છે.
હાલ સુધી સંબંધિત વિભાગ તરફથી કારખાનું ફરી શરૂ થવા અંગે કોઈ સત્તાવાર સ્પષ્ટતા સામે આવી નથી. જો ખરેખર સીલ કરાયેલું એકમ ફરી કાર્યરત થયું હોય તો તેની પરવાનગી કોણે આપી અને કયા આધારે આપી તે પણ તપાસનો વિષય બન્યો છે.
આ સમગ્ર મામલે હવે લોકોની નજર ફૂડ અને આરોગ્ય વિભાગની આગામી કાર્યવાહી પર છે. એનાલોગ પનીરના વેચાણ અંગે સ્પષ્ટ નીતિ, જાહેરનામું અને અસરકારક અમલ થાય તેવી માંગ ઉઠી રહી છે.
