ગુજરાતના વિવિધ વિસ્તારોમાં ઓછા વરસાદને કારણે ખેડૂતોની સ્થિતિ ચિંતાજનક હોવાનો દાવો કરીને આમ આદમી પાર્ટી દ્વારા શરૂ કરાયેલું ‘દુષ્કાળ ઘોષણા સત્યાગ્રહ’ વધુ ઉગ્ર બનવાના સંકેતો મળી રહ્યા છે. ખંભાળિયા ખાતે સત્યાગ્રહના ચોથા દિવસે AAPના પ્રદેશ પ્રમુખ ઈસુદાન ગઢવીએ સરકારને મોટું અલ્ટીમેટમ આપ્યું છે.
ઈસુદાન ગઢવીએ જણાવ્યું કે, જો આગામી કેબિનેટ બેઠકમાં ગુજરાતને દુષ્કાળગ્રસ્ત જાહેર કરવામાં નહીં આવે તો બપોરે 2 વાગ્યા બાદ આંદોલનના બીજા તબક્કાની જાહેરાત કરવામાં આવશે. તેમના જણાવ્યા મુજબ, જામનગર, દ્વારકા અને પોરબંદર સહિતના વિસ્તારોમાં ખેડૂતો ઓછા વરસાદને કારણે મુશ્કેલીનો સામનો કરી રહ્યા છે.
ખેડૂતોની સ્થિતિને લઈને સરકાર પર પ્રહાર
ઈસુદાન ગઢવીએ આક્ષેપ કર્યો કે વરસાદની અછત વચ્ચે સરકારે ખેડૂતોની પૂરતી મદદ કરવી જોઈએ, પરંતુ સરકાર તરફથી ખેડૂતોના પ્રશ્નોને યોગ્ય રીતે સાંભળવામાં આવતા નથી. તેમણે દાવો કર્યો કે અનેક વિસ્તારોમાં ચોમાસુ પાકને નુકસાન થયું છે અને બિયારણ, ખાતર, પાણી તથા ખેતી પાછળ કરવામાં આવેલા ખર્ચને કારણે ખેડૂતો પર આર્થિક ભાર વધ્યો છે.
તેમણે વધુમાં કહ્યું કે કેટલાક વિસ્તારોમાં બોર અને કૂવાના પાણીના સ્તરને લઈને પણ ચિંતા છે, જેના કારણે આગામી સિઝનની ખેતીને અસર થવાની શક્યતા છે.
‘સરકાર ખેડૂતોની મદદ કરે’ : ઈસુદાન ગઢવી
ઈસુદાન ગઢવીએ સરકાર સમક્ષ દુષ્કાળગ્રસ્ત વિસ્તારોની યોગ્ય રીતે સમીક્ષા કરીને ખેડૂતોને રાહત આપવાની માંગ કરી છે. સાથે જ તેમણે રાજ્યના તમામ ધારાસભ્યોને મુખ્યમંત્રી સમક્ષ ખેડૂતોની સ્થિતિ રજૂ કરવા માટે આગળ આવવાની અપીલ કરી છે.
AAP નેતાએ એવો પણ આરોપ લગાવ્યો કે આંદોલનને રોકવા માટે સ્થાનિક સ્તરે સરપંચો, કર્મચારીઓ, અધિકારીઓ અને પોલીસ પર દબાણ કરવામાં આવી રહ્યું છે. જોકે, આ અંગે સરકાર તરફથી સત્તાવાર પ્રતિક્રિયા આવવી બાકી છે.
ગોપાલ ઇટાલીયાએ પણ સરકારને ઘેરી
સત્યાગ્રહ છાવણી ખાતે AAP ધારાસભ્ય ગોપાલ ઇટાલીયાએ પણ ખેડૂતોની સ્થિતિને લઈને સરકાર પર નિશાન સાધ્યું. તેમના જણાવ્યા પ્રમાણે, દક્ષિણ ગુજરાતને બાદ કરતાં રાજ્યના અનેક વિસ્તારોમાં ઓછા વરસાદને કારણે ખેતી પર ગંભીર અસર પડી રહી છે.
ઇટાલીયાએ કહ્યું કે ખેડૂતોએ બિયારણ, ખાતર, પાણી, દવા અને મજૂરી સહિત ખેતી પાછળ ખર્ચ કર્યો છે. જો પાક નિષ્ફળ જાય તો ખેડૂતોને મોટું આર્થિક નુકસાન થઈ શકે છે. તેમના મતે સરકાર સમયસર સહાય જાહેર કરે તો ખેડૂતો, ખેતમજૂરો અને પશુપાલકો સામે ઊભું થઈ રહેલું આર્થિક સંકટ હળવું થઈ શકે છે.
ભાજપ પર રાજકીય પ્રહાર
ગોપાલ ઇટાલીયાએ સત્તાધારી ભાજપ પર પણ આકરા પ્રહારો કર્યા. તેમણે સવાલ ઉઠાવ્યો કે ખેડૂતોના સુકાઈ રહેલા પાકની સ્થિતિ ભાજપના નેતાઓને કેમ દેખાતી નથી. તેમણે સરકારનું ધ્યાન ખેડૂતો, ખેતમજૂરો અને પશુપાલકોની સમસ્યાઓ તરફ દોરવાની માંગ કરી.
આ દરમિયાન ઇટાલીયાએ રાજકીય કટાક્ષ કરતાં કહ્યું કે રાજ્યમાં માત્ર વરસાદની અછત જ નહીં, પરંતુ સારા નેતાઓની પણ અછત હોવાનું તેમને લાગે છે.
કેબિનેટના નિર્ણય પર હવે નજર
દુષ્કાળ જાહેર કરવાની માંગને લઈને AAPના સત્યાગ્રહ વચ્ચે હવે આગામી કેબિનેટ બેઠક પર સૌની નજર છે. સરકાર તરફથી દુષ્કાળ જાહેર કરવા અંગે શું નિર્ણય લેવામાં આવે છે અને જો નિર્ણય AAPની માંગ મુજબ નહીં આવે તો આંદોલનનું આગામી સ્વરૂપ શું હશે, તેના પર રાજકીય વર્તુળોની નજર રહેશે.
