ભાવનગર: મહુવા તાલુકાના બોરડી ગામે વાડી ફરતે ગેરકાયદેસર રીતે વીજપ્રવાહ છોડવામાં આવતા એક સિંહણનું કરંટ લાગવાથી મોત થયું છે. સિંહોની અવરજવર માટે જાણીતા વિસ્તારમાં બનેલી આ ઘટનાથી વન્યજીવ સુરક્ષા સામે ગંભીર સવાલો ઉભા થયા છે. પ્રાથમિક માહિતી મુજબ, વાડીના તારને વીજપોલ પરથી સીધી લાઈન દ્વારા વીજ જોડાણ આપી તેમાં વીજપ્રવાહ વહેતો કરવામાં આવ્યો હતો.
મળતી માહિતી પ્રમાણે, બોરડી ગામે જાની નંદલાલ ભીખાલાલની માલિકીની વાડીમાં આ ઘટના બની હતી. વાડી ભાગીયા તરીકે ગોબરભાઈ દાદુભાઈ મકવાણાને આપવામાં આવી હોવાનું સામે આવ્યું છે. આરોપ મુજબ, વાડી ફરતે સુરક્ષા માટે બાંધવામાં આવેલા તારને વીજપોલ પરથી સીધી લાઈન મારફતે વીજપ્રવાહ સાથે જોડવામાં આવ્યો હતો.
વહેલી સવારે અંદાજે પાંચ વાગ્યાના અરસામાં શિકારની શોધમાં સિંહણ આ વિસ્તારમાં પહોંચી હતી. વાડી ફરતે લગાવવામાં આવેલા તારના સંપર્કમાં આવતા તેને જોરદાર વીજ કરંટ લાગ્યો હતો અને તેનું ઘટનાસ્થળે જ મોત થયું હતું. સિંહણનું મૃતદેહ મળી આવતા સ્થાનિક સ્તરે ઘટનાની જાણ કરવામાં આવી હતી.
માહિતી મળતા મહુવા ફોરેસ્ટ વિભાગની ટીમ તાત્કાલિક ઘટનાસ્થળે પહોંચી હતી. આ સાથે પીજીવીસીએલ અને એફએસએલની ટીમને પણ સ્થળ પર બોલાવવામાં આવી હતી. ટીમોએ ઘટનાસ્થળનું નિરીક્ષણ કરી વીજ જોડાણ અને તાર અંગે તપાસ હાથ ધરી હતી. વધુ નુકસાન ન થાય તે માટે તાત્કાલિક વીજપ્રવાહ બંધ કરાવવામાં આવ્યો હતો અને સિંહણના મૃતદેહને કબજે લેવામાં આવ્યો હતો.
વનવિભાગની પ્રાથમિક તપાસમાં વાડી ફરતે લગાવવામાં આવેલા તાર સુધી વીજપ્રવાહ પહોંચાડવા માટે ગેરકાયદેસર રીતે સીધી લાઈન લેવામાં આવી હોવાની વિગતો સામે આવી છે. સમગ્ર ઘટનામાં વનવિભાગે વાડીના ભાગીયા ગોબરભાઈ દાદુભાઈ મકવાણા તેમજ વાડી માલિક સામે ગુનો નોંધી કાયદેસરની કાર્યવાહી શરૂ કરી છે. વીજ જોડાણ કેવી રીતે કરવામાં આવ્યું હતું અને તેમાં અન્ય કોઈની સંડોવણી છે કે કેમ તે અંગે પણ તપાસ ચાલી રહી છે.
મહુવા અને આસપાસનો વિસ્તાર સિંહોની અવરજવર ધરાવતો હોવાથી વાડી કે ખેતરની સુરક્ષા માટે ગેરકાયદેસર રીતે વીજપ્રવાહ છોડવો અત્યંત ગંભીર બાબત માનવામાં આવી રહી છે. આવી બેદરકારીથી માત્ર વન્યજીવો જ નહીં, પરંતુ ખેડૂતો, ખેતમજૂરો અને આસપાસના લોકોના જીવને પણ જોખમ ઊભું થઈ શકે છે.
સિંહણના મોતની ઘટનાને પગલે વનવિભાગ દ્વારા સમગ્ર મામલે વધુ તપાસ હાથ ધરવામાં આવી છે. ગેરકાયદેસર વીજ જોડાણ કરનારાઓ સામે કડક કાયદેસરની કાર્યવાહી કરવામાં આવે તેવી શક્યતા છે. સિંહોની સતત અવરજવર ધરાવતા વિસ્તારોમાં આવી જીવલેણ વ્યવસ્થાઓ અટકાવવી વન્યજીવ સંરક્ષણ માટે પણ અત્યંત જરૂરી બની છે.
