નેપાળમાં 26 ઓગસ્ટે આવેલા વિનાશક પૂર અને ભૂસ્ખલન બાદ સ્થિતિ હજુ પણ ગંભીર છે. શનિવારે ઉપલબ્ધ માહિતી પ્રમાણે મૃત્યુઆંક વધીને 788 થયો છે, જ્યારે કાટમાળ અને નદીના વિસ્તારોમાંથી મૃતદેહો શોધવાની કામગીરી સતત ચાલી રહી છે.

આ દરમિયાન અધિકારીઓએ ભોટેકોશી નદીના વધતા જળસ્તરને લઈને નવી ચેતવણી જાહેર કરી છે. પૂરગ્રસ્ત વિસ્તારોમાં રહેતા લોકો તેમજ રાહત અને બચાવ કામગીરીમાં જોડાયેલા કર્મચારીઓને સાવચેત રહેવા અપીલ કરવામાં આવી છે.

 2,500થી વધુ લોકો હજુ લાપતા

રાષ્ટ્રીય આપત્તિ જોખમ ઘટાડો અને વ્યવસ્થાપન સત્તામંડળ (NDRRMA)ના જણાવ્યા અનુસાર, આપત્તિ બાદ 2,502 લોકો હજુ ગુમ છે. તેમાં 591 વિદેશી નાગરિકોનો પણ સમાવેશ થાય છે.

બીજી તરફ, અત્યાર સુધીમાં આશરે 9,500 લોકોને સુરક્ષિત રીતે બચાવી લેવામાં આવ્યા છે. જોકે અનેક પરિવારો હજુ પોતાના સ્વજનોની શોધમાં છે અને મોટી સંખ્યામાં લોકોનું જીવન સંપૂર્ણપણે અસ્તવ્યસ્ત થઈ ગયું છે.

ભોટેકોશી નદીમાં ફરી વધ્યું પાણી

NDRRMAએ જણાવ્યું છે કે પૂરગ્રસ્ત ભોટેકોશી નદીમાં પાણીનું સ્તર ફરી વધ્યું છે. આ કારણે નદી આસપાસના વિસ્તારોમાં રહેતા લોકો અને બચાવ ટીમોને ખાસ તકેદારી રાખવા સૂચના આપવામાં આવી છે. અધિકારીઓ પરિસ્થિતિ પર નજર રાખી રહ્યા છે અને નવી માહિતી મળ્યા બાદ વધુ અપડેટ જાહેર કરવાની વાત કરી છે.

ચીનની બાજુએ પણ ભારે નુકસાન

આ આપત્તિની અસર માત્ર નેપાળ પૂરતી સીમિત રહી નથી. નેપાળ-તિબેટ સરહદ નજીક હિમપ્રપાત અથવા બરફ-ખડકોના ધસમસતા પ્રવાહ બાદ ઉત્તર અને મધ્ય નેપાળના અનેક વિસ્તારોમાં ભારે વિનાશ થયો હતો.

ભોટેકોશી નદી હિમાલયના સરહદી વિસ્તારોમાંથી દક્ષિણ તરફ વહે છે. પૂરના પાણીના કારણે અનેક મકાનો, વાહનો, રસ્તાઓ અને પુલોને નુકસાન પહોંચ્યું છે. જળવિદ્યુત પ્રોજેક્ટ્સ પણ તેની અસરથી બચી શક્યા નથી.

ચીન તરફથી મળતા અહેવાલો અનુસાર ત્યાં પણ 16 લોકોના મોત થયા છે, જ્યારે તિબેટમાં આશરે 550 લોકો ગુમ હોવાની માહિતી સામે આવી છે.

275થી વધુ ભારતીયો પણ સંપર્ક બહાર

ભારત માટે પણ આ આપત્તિ ચિંતાનો વિષય બની છે. ભારતના વિદેશ મંત્રાલય અનુસાર નેપાળમાં 275થી વધુ ભારતીયો અને ભારતીય મૂળના 128 લોકો ગુમ અથવા સંપર્કથી બહાર હોવાનું જણાવાયું છે.

આ દરમિયાન બચાવ કામગીરીમાં ભારત સહિત અનેક દેશોના લોકો અને પ્રવાસીઓને બહાર કાઢવામાં આવ્યા છે. બચાવાયેલા લોકોમાં ભારત, અમેરિકા, ચીન, રશિયા, બ્રિટન, સ્પેન, બેલ્જિયમ, જર્મની, ઇટાલી, માલ્ટા, તુર્કી, સ્વિટ્ઝર્લૅન્ડ અને પોર્ટુગલ સહિતના દેશોના નાગરિકોનો સમાવેશ થાય છે.

9,500 લોકોનું રેસ્ક્યૂ

અધિકારીઓના જણાવ્યા પ્રમાણે પૂરગ્રસ્ત વિસ્તારોમાંથી અત્યાર સુધીમાં લગભગ 9,500 લોકોને બચાવી લેવામાં આવ્યા છે.

પરંતુ રેસ્ક્યૂ બાદ પણ મુશ્કેલીઓ ઓછી થઈ નથી. અનેક બચી ગયેલા લોકો પોતાના પરિવારજનો અને સ્વજનોની રાહ જોઈ રહ્યા છે. બીજી તરફ, ઘર, રોજગાર અને મૂળભૂત સુવિધાઓ ગુમાવનાર લોકો સામે હવે ફરીથી જીવન શરૂ કરવાનો મોટો પડકાર છે.

મૃતદેહોની ઓળખ બની સૌથી મોટો પડકાર

આપત્તિ બાદ નેપાળની હોસ્પિટલોમાં પોતાના ગુમ થયેલા સ્વજનોની શોધ માટે મોટી સંખ્યામાં લોકો પહોંચી રહ્યા છે. મૃતદેહોની ઓળખ માટે હોસ્પિટલોમાં ફોટોગ્રાફ્સ પણ પ્રદર્શિત કરવામાં આવી રહ્યા છે.

જોકે, અધિકારીઓ માટે મૃતદેહોની ઓળખ કરવી મુશ્કેલ બની રહી છે. બાગમતી પ્રાંતીય પોલીસ કાર્યાલયના પ્રવક્તા રાજેન્દ્ર પ્રસાદ ધમાલાના જણાવ્યા મુજબ, અત્યાર સુધી મળેલા મૃતદેહોમાંથી માત્ર 17ની ઓળખ થઈ શકી છે.

તેમના જણાવ્યા પ્રમાણે અનેક મૃતદેહો લાંબા સમય સુધી પાણી અને કાટમાળમાં રહેવાને કારણે અત્યંત ખરાબ સ્થિતિમાં મળી રહ્યા છે, જેના કારણે ઓળખ પ્રક્રિયા મુશ્કેલ બની છે.

DNA સેમ્પલ સાચવી રાખવામાં આવ્યા

અધિકારીઓએ જણાવ્યું કે મૃતદેહોને દફનાવતા પહેલાં DNAના નમૂના લેવામાં આવી રહ્યા છે, જેથી ભવિષ્યમાં પરિવારજનોની ઓળખ કરવામાં મદદ મળી શકે.

કાયદાકીય પ્રક્રિયા પૂર્ણ કર્યા બાદ અત્યાર સુધીમાં 96 મૃતદેહોને દફનાવવામાં આવ્યા છે અને તેમના DNA નમૂનાઓ નિયમ મુજબ નિર્ધારિત સ્થળોએ સાચવી રાખવામાં આવ્યા છે.

આપત્તિ બાદ પણ જોખમ યથાવત

નેપાળમાં બચાવ કામગીરી ચાલી રહી છે, પરંતુ નદીઓમાં પાણીનું સ્તર વધવાની ચેતવણીને કારણે રાહત અને બચાવ ટીમો માટે પડકાર હજુ યથાવત છે. હજારો લોકો લાપતા છે અને અનેક પરિવારો પોતાના સ્વજનોની રાહ જોઈ રહ્યા છે.

આ વિનાશક આપત્તિએ નેપાળના અનેક વિસ્તારોમાં ભારે જાનમાલનું નુકસાન પહોંચાડ્યું છે. હવે સરકાર અને બચાવ એજન્સીઓ સામે લાપતા લોકોને શોધવા, મૃતદેહોની ઓળખ કરવા અને બચી ગયેલા લોકોનું પુનર્વસન કરવાનો મોટો પડકાર છે.

News Hotspot સાથે જોડાવવા અહી ક્લિક કરો`

Facebook સાથે જોડાવા અહી ક્લિક કરો

 Instagram સાથે જોડાવા અહી ક્લિક કરો

Twitter સાથે જોડાવા અહી ક્લિક કરો

Whatsapp ચેનલમાં જોડાવા અહી ક્લિક કરો
Website સાથે જોડાવા અહી ક્લિક કરો