ભાવનગર જિલ્લાના સિહોરમાં બુધવારે ટાણા-વરલ રૂટની રાજ્ય પરિવહન નિગમની (ST) બસ સાથે ગંભીર અકસ્માત સર્જાતા બે મહિલાના મોત થયા છે. મળતી પ્રાથમિક માહિતી મુજબ બસ સિહોર બસસ્ટેન્ડમાંથી બહાર નીકળી રહી હતી ત્યારે અચાનક બ્રેકમાં ખામી સર્જાઈ હતી. બ્રેક ફેઈલ થતાં ડ્રાઈવરે બસ પરનો કાબૂ ગુમાવ્યો હતો.
કાબૂ બહાર ગયેલી બસ સીધી ફૂટપાથ તરફ ધસી ગઈ હતી અને ભરૂચા ક્લબની દીવાલ સાથે જોરદાર ટક્કર મારી હતી. અકસ્માત સમયે ફૂટપાથ પર કેટલાક લોકો વાહનની રાહ જોઈ રહ્યા હતા. આ દરમિયાન બે મહિલાઓ બસની અડફેટે આવી જતાં ગંભીર રીતે ઘાયલ થઈ હતી.
પ્રાથમિક વિગતો અનુસાર અકસ્માતનું મુખ્ય કારણ બસની બ્રેક ફેઈલ થવાનું હોવાનું સામે આવ્યું છે. જોકે, અકસ્માત અંગેની સંપૂર્ણ હકીકત તપાસ બાદ વધુ સ્પષ્ટ થશે. પોલીસ દ્વારા સમગ્ર ઘટનાની તપાસ હાથ ધરવામાં આવી છે.
સિહોરમાં બનેલી આ ઘટનાએ જાહેર માર્ગો પર મુસાફરો અને રાહદારીઓની સુરક્ષાને લઈને ફરી એક વખત ગંભીર સવાલો ઊભા કર્યા છે. ખાસ કરીને બસસ્ટેન્ડ અને જાહેર સ્થળોની આસપાસ વાહનોની અવરજવર દરમિયાન સાવચેતી તથા વાહનોની નિયમિત તકનિકી ચકાસણી કેટલી જરૂરી છે તે આ ઘટના દર્શાવે છે.
અકસ્મતમાં જીવ ગુમાવનાર બંને મહિલાના પરિવારજનોમાં શોકનો માહોલ છવાયો છે. બીજી તરફ ઇજાગ્રસ્તોની સારવાર ચાલી રહી હોવાનું જાણવા મળે છે.
પોલીસ તપાસ શરૂ
ઘટના બાદ પોલીસે સ્થળ પર પહોંચી અકસ્માતની વિગતો એકત્રિત કરી હતી. બસને હટાવી માર્ગ પરનો ટ્રાફિક પૂર્વવત કરવાની કામગીરી પણ હાથ ધરવામાં આવી હતી. અકસ્માતમાં બસમાં સવાર મુસાફરો તથા અન્ય લોકોને થયેલી ઈજાઓ અંગેની વિગતો તપાસ આગળ વધે તેમ વધુ સ્પષ્ટ થઈ શકે છે.
